اسلام آباد۔ 30 جون (اے پی پی) چیئرمین سینیٹ سید یوسف رضا گیلانی ملک دے مختلف حصیاں اچ اڄوکی بارشاں پاروں تھیوݨ آلے جانی تے مالی ضیان تے ݙکھ تے افسوس کیتے۔ سینیٹ سیکرٹریٹ موجب چیئرمین سینیٹ متاثرہ ٹبراں نال دلی ہمدردی اَتے تعزیت کریندیں ہوئیں مرحومین کیتے مغفرت اَتے زخمیاں دی جلدی صحت یابی کیتے دعا منگی۔ سید یوسف رضا گیلانی آکھیا جو پوری قوم آزمائش دی ایں گھڑی وچ آپݨے مصیبت زدہ بھیݨ بھراواں نال کھڑی اے۔ انہاں وفاقی اَتے صوبائی حکومتاں سودھے سارے متعلقہ اداریاں تے زور ݙتا جو او فوری طور تے متاثرہ علاقیاں اچ ریلیف اَتے بحالی دیاں سرگرمیاں کوں تکڑا کرن اَتے متاثرین کوں ہر ممکن امداد ݙیون۔ انہاں قدرتی آفات نال مؤثر انداز وچ نبڑݨ کیتے جامع، منظم اَتے پیشگی حکمت عملی بݨاوݨ دی لوڑھ تے وی زور ݙتا تاں جو مستقبل وچ ایں طرح دے حادثیاں نال تھیوݨ آلے نقصاناں کوں گھٹ توں گھٹ کیتا ونج سڳے۔
