اسلام آباد۔ 30 جون (اے پی پی) ترجمان دفتر خارجہ آکھیا جو کشن گنگا اَتے رتلے ہائیڈرو الیکٹرک پراجیکٹس تے پاکستان اَتے بھارت وچال تنازعے دی سُݨوائی کرݨ آلی ثالثی عدالت فیصلہ ݙتے جو اوں دی اہلیت برقرار اے اَتے ایں کارروائی کوں بروقت، مؤثر اتے منصفانہ انداز وچ اڳوں ودھاوݨ اوں دی ذمہ داری اے۔ ترجمان دفتر خارجہ سنوار کوں جاری بیان اچ آکھیا جو پاکستان ثالثی عدالت ولوں اعلان کیتے ڳئے ضمنی ایوارڈ دا خیرمقدم کریندے۔ترجمان آکھیا جو 27 جون کوں ثالثی عدالت ایں ضمنی ایوارڈ دا اعلان کرݨ دا فیصلہ بھارت ولوں سندھ طاس معاہدے کوں ملتوی کرݨ دے غیر قانونی اَتے ہک پاسوں اعلان دے تناظر وچ کیتا۔ ترجمان دفتر خارجہ آکھیا جو پاکستان ایں ضمنی ایوارڈ دا خیرمقدم کریندے، اے ایوارڈ پاکستان دے ایں مؤقف دی توثیق کریندے جو سندھ طاس معاہدہ درست اَتے فعال اے اَتے بھارت کوں ایں تے ہک پاسوں کارروائی کرݨ دا کوئی حق کائنی۔ ترجمان آکھیا جو اساں بھارت تے زور ݙیندوں جو او سندھ طاس معاہدے دے معمول دے کم کوں فوری طور تے ولا شروع کرے اَتے آپݨیاں معاہداتی ذمہ واریاں کوں پورا کرے۔
