اسلام آباد۔ 1 جولائی (اے پی پی) پاکستان اَتے بھارت منگل کوں سفارتی ذریعہ نال ہک ٻئے دی حراست آچ قیدیاں دی فہرستاں دا تبادلہ کیتا۔ ترجمان دفتر خارجہ ولوں جاری بیان موجب فہرستاں دا تبادلہ قونصلر رسائی 2008 دے معاہدے دے تحت تھیا۔ معاہدے دے مطابق ݙوہیں فریقین ہر سال یکم جنوری اَتے یکم جولائی کوں ہک ٻئے دی تحویل اچ قیدیاں دی فہرستاں ݙیوݨ دے پابند ہن۔ وزارت خارجہ موجب حکومت پاکستان 246 بھارتی قیدیاں (53 شہری قیدیاں اَتے 193 ماہی گیراں) دی فہرست اسلام آباد اچ بھارتی ہائی کمیشن دے نمائندے دے حوالے کیتی۔ ایں دے نال ای بھارتی حکومت 463 پاکستانی یا منّے ونجݨ آلے پاکستانی قیدیاں (382 سویلین قیدیاں اَتے 81 ماہی گیراں) دی فہرست نویں دہلی اچ پاکستان دے ہائی کمیشن دے ہک سفارت کار نال شیئر کیتی۔ بیان موجب حکومت پاکستان انہاں سارے پاکستانی قیدیاں اَتے ماہی گیراں دی فوری رہائی اَتے وطن واپسی دا مطالبہ کیتا جیہڑے آپݨی متعلقہ سزا پوری کر ڳھدی اے اَتے جِنھاں دی قومی حیثیت دی تصدیق تھی ڳئی اے۔ سارے پاکستانی قیدیاں جِنھاں اچ جسمانی اَتے ذہنی طور تے معذور قیدی وی شامل ہن، کیتے خصوصی قونصلر رسائی دی درخواست وی کیتی ڳئی اے تاں جو انہاں دی قومی حیثیت دی جلدی تصدیق تھی سڳے۔ بیان وچ ٻیا آکھیا ڳیا جو بھارتی حکومت زور ݙیتا ڳئے جو او انہاں سارے قیدیاں کوں قونصلر رسائی ݙیوے جِنھاں تئیں قونصلر رسائی دا ہنوز انتظار اے۔ بھارت تے اے وی زور ݙتا ڳیا جو او بھارتی حراست اچ سارے پاکستانی قیدیاں دی حفاظت، سلامتی اَتے بھلائی کوں یقینی بݨاوے۔دفتر خارجہ دے ترجمان آکھیا جو حکومت پاکستان انسانی ہمدردی دے معاملاں کوں ترجیح دے طور تے حل کرݨ کیتے پُرعزم اے اَتے او بھارتی جیلاں وچ قید سارے پاکستانیاں دی جلدی واپسی کوں یقینی بݨاوݨ کیتے آپݨی کوششاں جاری رکھیسی۔
