اسلام آباد۔ 1 جولائی (اے پی پی) وزیراعظم محمد شہباز شریف آکھیا جو علم تے ادب اَتے فنون لطیفہ کوں پاسّے رکھݨ آلے معاشرے مشینی سوچ دا شکار تھی تے لطیف انسانی جذبات توں محروم تھی ویندن۔ انہاں آکھیا جو اِنہاں اداریاں دے نظم و نسق اَتے کارکردگی کوں بہتر بݨاوݨ، نویں دور دے تقاضیاں دے مطابق انہاں دے دائرہ کار اَتے مینڈیٹ کوں وݙا کرݨ کیتے حکومت جلدی ہک کمیٹی بݨیسی۔ منگل کوں وزیراعظم آفس دے میڈیا ونگ توں جاری بیان موجب وزیراعظم محمد شہباز شریف نال پاکستان مسلم لیگ (ن) دے پارلیمانی پارٹی لیڈر سینیٹر عرفان صدیقی ملاقات کیتی۔ایں موقع تے وزیراعظم آکھیا جو علم تے ادب دے سر چشمے معاشرے دی روح ہوندن، اساں تہذیب تے ثقافت دا وݙا سرمایہ رکھدیندوں جئیں تے پوری قوم کوں فخر اے۔ علمی، ادبی، تاریخی اَتے ثقافتی اہمیت دے قومی اداریاں دی بندش یا رَلّاوݨ دی کہیں تجویز تے عمل درآمد حکومت دے غور اچ کائینی، ایں دے برعکس انہاں اداریاں کوں ٻیا مضبوط، مؤثر اَتے کارآمد بݨاوݨ دی کوشش کریسوں تاں جو معاشرہ انتہا پسندی جیڑھے مرض توں پاک تھیوے اَتے اساݙا حقیقی مثبت تاثر دنیا دے سامݨے اُبھرے۔ سینیٹر عرفان صدیقی وزیراعظم کوں علمی اداریاں دی بندش یا ہک ٻئے اچ رَلّاوݨ بارے حکومت دی “رائٹ سائزنگ کمیٹی” دی سفارشات تے پورے ملک اچ اہل علم و دانش، ادیباں، شاعراں اَتے فنون لطیفہ توں تعلق رکھݨ آلے طبقیاں وچ پاتی ونجݨ آلی تشویش دا ݙسیا۔ سینیٹر عرفان صدیقی وزیراعظم کوں ݙسیا جو سابق وزیراعظم نواز شریف دے گزریل دور اچ انہاں اداریاں تے خاص توجہ ݙتی ڳئی ہئی اَتے انہاں دی کارکردگی کوں ملک دے ہر طبقے وچ سراہیا ڳیا ہا۔ وزیراعظم محمد شہباز شریف آکھیا جو علم و ادب اَتے فنون لطیفہ کوں پاسّے رکھݨ آلے معاشرے مشینی سوچ دا شکار تھی تے لطیف انسانی جذبات توں محروم تھی ویندن۔ وزیراعظم آکھیا جو انہاں اداریاں دے نظم و نسق اَتے کارکردگی کوں بہتر بݨاوݨ، نویں دور دے تقاضیاں دے مطابق انہاں دے دائرہ کار اَتے مینڈیٹ کوں وݙا کرݨ کیتے حکومت جلدی ہک کمیٹی بݨیسی۔ سینیٹر عرفان صدیقی علمی اَتے ادبی اداریاں بارے وزیراعظم دے واضح اعلان دا شکریہ ادا کیتا۔
