اسلام آباد۔ 1 جولائی (اے پی پی) وزیراعظم محمد شہباز شریف دا ایران دے سفارتخانے دا دورہ، ایران دے خلاف اڄوکی اسرائیلی جارحیت اچ شہید اتے زخمی تھیوݨ آلیاں کیتے ایران دی عوام اتے حکومت نال تعزیت کیتی۔ وزیراعظم آفس دے میڈیا ونگ توں جاری بیان موجب وزیراعظم محمد شہباز شریف منگل کوں اسلام آباد اچ اسلامی جمہوریہ ایران دے سفارتخانے دا دورہ کیتا اَتے ایرانی سفارتخانے ولوں ایران دے خلاف اڄوکی اسرائیلی جارحیت اچ شہید اتے زخمی تھیوݨ آلے ایرانیاں دی یاد وچ رکھی ڳئی تعزیتی کتاب وچ آپݨے تاثرات درج کیتے۔نائب وزیراعظم اتے وزیر خارجہ محمد اسحاق ڈار، وزیراعظم دے مشیر طارق فاطمی اَتے سیکرٹری خارجہ وی انہاں دے نال ہن۔ سفارتخانے آوݨ تے پاکستان اچ ایرانی سفیر رضا امیری مقدم اتے سفارتخانے دے سینیئر ارکان وزیراعظم دا استقبال کیتا۔ وزیراعظم ایں اوکھے ویلھے ایران نال پاکستان دی ہمدردی اتے یکجہتی دا اعادہ کریندیں ہوئیں ایران دی عوام اتے حکومت نال تعزیت کیتی۔ انہاں ایرانی قوم دی استقامت اتے حوصلے کوں زبردست خراج تحسین پیش کریندیں ہوئیں شہید تھیوݨ آلیاں اتے زخمیاں دی جلدی صحت یابی کیتے دعا منڳی۔ ایران کوں پاکستان دی مسلسل حمایت دا یقین ݙویندیں ہوئیں وزیراعظم ایرانی سپریم لیڈر آیت اللہ علی خامنہ ای اتے صدر ڈاکٹر مسعود پیزشکیان کیتے آپݨی نیک خواہشات دا اظہار وی کیتا۔
