اسلام آباد۔ 1 جولائی (اے پی پی) وزیراعظم محمد شہباز شریف مستقبل اچ قدرتی آفات نال نبڑݨ کیتے اعلیٰ سطح دی تیاریاں تے زور ݙیندیں ہوئیں آکھیا جو این ڈی ایم اے NDMA) دی استعداد کار ودھاوݨ کیتے ہرممکن تعاون کریسوں۔ انہاں آکھیا جو بھارت پاݨی کوں ہتھيار دے طور تے استعمال کریندا پئے، بھارت کوں سندھ طاس معاہدہ معطل کرݨ یا ختم کرݨ دا کوئی اختیار نئیں، اساں آپݨے وسائل نال دیامر بھاشا ݙیم سودھے ݙوجھے مقاماں تے غیر متنازعہ آبی ذخائر دی صلاحیت تعمیر کریسوں۔ اے ڳالھیں انہاں منگل کوں این ݙی ایم اے دے تحت نیشنل ایمرجنسی آپریشنز سینٹر دے دورے دے موقع تے گالھ مہاڑ کریندیں ہوئیں کیتی۔وزیراعظم آکھیا جو نیشنل ایمرجنسی آپریشنز سینٹر اچ بہترین سہولتاں موجود ہن، 2022 وچ تباہ کن سیلاب دے بعد اے آپریشن سینٹر ٻݨایا ڳئیا ہئی، ایں سیلاب اچ ملک دا وݙا علاقہ پاݨی وچ آ ڳئے اَتے کھڑیاں فصلاں تباہ تھی ڳئیاں، لکھاں گھر مکمل طور تے تباہ تھی ڳئے، 2022 دے سیلاب دے بعد ادارے کوں جدید بنیاداں تے استوار کیتا ڳیا۔ انہاں آکھیا جو نیشنل ڈیزاسٹر مینجمنٹ اتھارٹی ہک کثیر المقاصد اہم قومی ادارہ اے اَتے اوں دے صوبیاں دے نال مربوط رابطے ہن۔ انہاں آکھیا جو ایں ادارے وچ ارلی وارننگ سسٹم اَتے صوبیاں کوں بروقت آگاہی دا نظام موجود اے اَتے اوندے کول حفاظتی جدید آلات موجود ہن جیہڑے ریسکیو اَتے ریلیف کیتے بہوں مددگار ہن۔انہاں آکھیا جو پاکستان موسمیاتی تبدیلی اَتے کلاؤڈ برسٹ (بادل پھٹݨ) توں سبھ توں ودھ متاثرہ 10 ملکاں وچ شامل اے، پاکستان دا گرین ہاؤس گیساں دے اخراج وچ حصہ ہک فیصد توں وی گھٹ اے۔ انہاں وزیر منصوبہ بندی اتے وزیر موسمیات کوں ہدف ݙتا جو او پاکستان اچ زراعت اَتے ہاؤسنگ سودھے ٻئے شعبیاں اَتے ریزیلیئنٹ انفراسٹرکچر کیتے قرضیاں تے نئیں بلکہ گرانٹس اَتے پبلک پرائیویٹ سرمایہ کاری کیتے مذاکرات کرن۔ انہاں آکھیا جو اساݙی معیشت اَتے سماجی تے معاشی سٹرکچر کیتے اے بہترین پلیٹ فارم اے، حکومت ایں ادارے اَتے اوں دی صلاحیتاں اچ بہتری اَتے صوبیاں نال ہر ممکن تعاون کیتے تیار اے۔ وزیراعظم آکھیا جو میکوں خوشی اے جو اے ادارہ بالخصوص دوست ملکاں سمیت ݙوجھے ملکاں کوں بروقت آگاہی اَتے معلومات ݙیندا پئے، ترکیہ اچ تباہ کن زلزلے دے بعد ایں ادارے اتھاں منظم ریسکیو آپریشن کیتے انتھک محنت کیتی، میانمار سودھے ݙوجھے جہیں تے وی آپݨیاں صلاحیتاں دا لوہا منوایا۔ انہاں آکھیا جو ہݨ ویلھا آ ڳئے جو اساں آپݨے مستقبل دی منصوبہ بندی کروں۔ انہاں آکھیا جو غیر متوقع ہیٹ ویو پاروں گلیشیئرز پگھلدے پئن ، ایں تناظر اچ اعلیٰ سطح دی تیاریاں دی لوڑھ اے۔ انہاں آکھیا جو سوات وچ قیمتی جاناں دے ضیان تے بہوں افسوس اے، پوری قوم ایں واقعے تے ݙکھ اچ اے، ایں سانگے سیاست توں ہٹ تے ایں معاملے دا دیانتداری نال جائزہ گھنݨا چاھیدے، این ڈی ایم اے ایں معاملے دی رپورٹ بݨا تے پیش کرے۔ انہاں آکھیا جو پورے ملک اچ اڄوکی بارشاں اچ تقریباً 50 بندے جاں بحق اَتے بہوں سارے زخمی تھئن، مستقبل اچ ایجھے واقعیاں کوں روکݨ کیتے صوبائی حکومتاں اَتے پی ڈی ایم اے نال رَل تے مربوط حکمت عملی بݨاوݨی چاھیدی اے۔ انہاں آکھیا جو اساݙا دشمن پاݨی کوں ہتھيار دے طور تے استعمال کریندا پئے، عالمی ثالثی عدالت ولوں فیصلے نال اوں کوں پسپائی تھئی اے، عدالت فیصلہ ݙتے جو بھارت سندھ طاس معاہدے کوں ہک پاسوں نہ معطل کر سڳدے اَتے نہ ہی ایں توں اںج تھی سڳدے لیکن بدقسمتی نال اوں دے ناپاک اَتے خطرناک ارادے ہن، حکومت سندھ طاس معاہدے دے خلاف بھارتی اقدامات نال نبڑݨ کیتے فیصلہ کیتے جو پاݨی ذخیرہ کرݨ دی صلاحیت ودھائی ونڄے، آپݨے وسائل نال دیامر بھاشا ݙیم سودھے ٻئی جہیں تے غیر متنازعہ آبی ذخائر دی صلاحیت تعمیر کریسوں، چاریں صوبیاں وچال 1991 دے آبی معاہدے دے تحت اے آبی ذخائر تعمیر کیتے ویسن، ایں وچ این ڈی ایم اے دا اہم کرداراے۔ این ڈی ایم اے دے کول ڈرون سودھے ݙوجھے جدید آلات دی موجودگی خوش آئند اے۔ ایں موقع تے چیئرمین این ڈی ایم اے لیفٹیننٹ جنرل انعام حیدر بریفنگ وی ݙتی۔ نائب وزیراعظم تے وزیر خارجہ سینیٹر اسحاق ڈار، وزیر منصوبہ بندی و ترقی احسن اقبال، وزیر اطلاعات تے نشریات عطاء اللہ تارڑ، چیئرمین این ڈی ایم اے لیفٹیننٹ جنرل انعام حیدر اتے این ڈی ایم اے دے اعلیٰ حکام وی ایں موقع تے موجود ہن۔
