اسلام آباد۔ 1 جولائی (اے پی پی) پبلک پروکیورمنٹ ریگولیٹری اتھارٹی (پیپرا) پاکستان دے پہلے الیکٹرانک ڈسپوزل ماڈیول دے پائلٹ فیز دا باقاعدہ آغاز کر ݙتے۔ اے نظام ملک اچ سرکاری خریداری کیتے پہلے توں نافذ ای-پاک ایکوزیشن اتے ڈسپوزل سسٹم (ای-پیڈز) دے تحت سرکاری اثاثیاں دی فروخت دے نظام کوں جدید بݨاوݨ ول ہک اہم قدم اے۔ مینجنگ ڈائریکٹر پیپرا حسنات احمد قریشی ایں نظام کوں ای-پیڈز پروجیکٹ مینجمنٹ یونٹ (پی ایم یو) اسلام آباد اچ تھیوݨ آلی ہک تقریب اچ لانچ کیتا۔ای-ڈسپوزل سسٹم دا مقصد سرکاری اثاثہ جات دی فروخت دے عمل کوں سوکھا بݨاوݨ اَتے پاکستان اچ نجکاری دے عمل وچ مدد ݙیوݨی اے۔ ایں نظام دا پائلٹ مرحلہ پاکستان کسٹمز اتے وزارت وفاقی تعلیم تے پیشہ ورانہ تربیت دے نال شروع کیتا ڳئے، اے ادارے یکم جولائی 2025 توں ایں پلیٹ فارم دا لازمی نفاذ شروع کریسن جݙاں جو ایں سال دسمبر تئیں اونکوں وفاقی حکومت دے سارے اداریاں تئیں ودھایا ویسی۔تقریب دے بعد ای-ڈسپوزل ماڈیول تے ماسٹر ٹرینرز کیتے ترائے ݙینھ دے تربیتی سیشن دا انعقاد کیتا ڳیا جئیں اچ پاکستان کسٹمز اتے وزارت وفاقی تعلیم تے پیشہ ورانہ تربیت نال تعلق رکھݨ آلے 26 افسراں تے اہلکاراں شرکت کیتی، اے ݙوہیں ادارے پائلٹ فیز اچ شامل ابتدائی محکمے ہن۔ ایں موقع تے ایم ڈی پیپرا حسنات احمد قریشی پی ایم یو ٹیم دی کوششاں کوں سراہیندے ہوئیں شرکاء تے زور ݙتا جو او نظام توں بھرپور فیدہ چاوݨ اَتے تعمیری رائے ݙیون تاں جو نظام کوں حتمی نفاذ توں پہلے ٻیا بہتر بݨایا ونج سڳے۔ انہاں ایں گالھ تے وی زور ݙتا جو وزیراعظم دے وژن ڈیجیٹل پاکستان دے تحت پیپرا ملک اچ سرکاری خریداری دے نظام کوں کامیابی نال ڈیجیٹلائز کر ݙتے۔ ای-پیڈز ایں ویلھے وفاقی تے صوبائی سطح تے اٹھ ہزار توں ودھ خریداری کرݨ آلے اداریاں اچ فعال اے جݙاں جو ایں نال جُڑے رجسٹرڈ سپلائرز دی تعداد 32 ہزار توں ودھ تھی ڳئی اے۔ ایں مالی سال اچ ایں نظام دے تحت 748 ارب روپے دی خریداری مکمل کیتی ڳئی جݙاں جو 2,602 ارب روپے دے منصوبے عملدرآمد دے مرحلیاں اچ ہن۔ تقریب اچ پروجیکٹ ڈائریکٹر پی ایم یو شیخ افضال رضا اتے سینیئر سپیشلسٹ ٹریننگ تے کیپیسٹی بلڈنگ عتیق سلطان راجہ وی آپݨی ٹیماں دے نال موجود ہن۔
