پشاور۔ 02 جولائی (اے پی پی) باجوڑ اچ بُدھ کوں بارودی مواد دے دھماکے وچ ناواگئی دے اسسٹنٹ کمشنر فیصل سلطان سودھے 4 بندے شہید تھی ڳئے۔ ٻئے شہداء اچ تحصیلدار وکیل، باجوڑ پولیس دے اے ایس آئی نور حکیم اَتے پولیس کانسٹیبل رشید شامل ہن۔ پولیس حکام موجب باجوڑ دی تحصیل خار دے علاقے صادق آباد پھاٹک اچ گاݙی دے نیڑے بارودی مواد دے دھماکے اچ ٻئے 11 بندے زخمی وی تھئے۔ دھماکے دے بعد سکیورٹی اہلکاراں علاقے کوں گھیرے اچ گھن ڳِھدا۔ دھماکے دی نوعیت اتے ذمہ واراں دا تعین کرݨ کیتے تحقیقات دا آغاز کر ݙتا ڳئے۔ ریسکیو حکام آکھیا جو ریسکیو ٹیماں امدادی کارروائیاں اچ مصروف ہن اَتے زخمیاں کوں ہسپتال منتقل کیتا ویندا پئے۔
