اسلام آباد۔ 3 جولائی (اے پی پی) وفاقی وزیرِ صحت سید مصطفیٰ کمال نال پولیو اوور سائٹ بورڈ (پی او بی) دے ہک اعلیٰ سطحی وفد ملاقات کیتی۔ وفد دی قیادت جی پی ای آئی دے پولیو اوور سائٹ بورڈ (پی او بی) دے چیئرمین اَتے گیٹس فاؤنڈیشن وچ گلوبل ݙیولپمنٹ دے صدر ݙاکٹر کرس ایلس کیتی۔ ایں موقع تے وزیرِاعظم دی فوکل پرسن انسدادِ پولیو عائشہ رضا فاروق وی موجود ہن۔وزیرِ صحت وفد کوں پاکستان وچ پولیو مکاوݨ کیتے جاری حکومتی اقدامات، پیش آوݨ آلے چیلنجز اتے آوݨ آلے لائحہ عمل تے تفصیلی بریفنگ ݙتی۔ اوہناں آکھیا جو پولیو دا منڈھوں خاتمہ حکومتِ پاکستان دی پہلی ترجیح اے اَتے وفاقی و صوبائی حکومتاں ہک تھی تے ایں مقصد کیتے کم کریندیاں پئن۔ وزیر صحت آکھیا جو وزیراعظم دی قیادت وچ پاکستان کوں وختی پولیو توں پاک کیتا ویسی اَتے ایں کیتے اساں سارے ریاستی وسائل استعمال کریسوں۔اوہناں آکھیا جو پولیو مکاوݨ دی جدوجہد وچ اساݙے ہیلتھ ورکرز اپݨیاں جاناں دا نذرانہ پیش کیتے جیڑھا اساݙے پختہ عزم دا ثبوت اے۔ اوہناں ایں ڳالھ تے وی زور ݙتا جو پولیو وائرس ایں ویلھے صرف پاکستان اتے افغانستان وچ موجود اے اَتے انہاں ݙوہیں ملکاں کوں پولیو وائرس دے حوالے نال سانجھا زون سمجھیا ویندے۔ اساں سرحد پار وائرس کھنڈݨ کوں روکن کیتے ہکے ویلھے مہمات دا انعقاد کریندے پیوں اَتے نقل مکانی کرݨ آلیاں آبادیاں تے خصوصی توجہ ݙتی ویندی پئی اے۔ اساݙی خواہش اے جو پاکستان اَتے افغانستان ہکے ویلھے پولیو توں پاک تھی ونڄن۔ترجمان وزارتِ صحت موجب ، اعلیٰ سطحی وفد افغانستان دے دورے دے بعد پاکستان پُڄے اَتے او وزیراعظم سودھے ݙوجھے اعلیٰ حکام نال وی ملاقات کریسی۔ وفد پاکستان دے انسدادِ پولیو اقدامات دی تعریف کیتی تے پاکستان دے نال تعاون جاری رکھݨ دے عزم دا اعادہ کیتا۔ وفد وچ ݙبلیو ایچ او دی مشرقی بحیرہ روم دی ریجنل ڈائریکٹر ڈاکٹر حنان بلخی، یونیسیف دے جنوبی ایشیا دے ریجنل ڈائریکٹر سنجے وجیسیکرا، روٹری انٹرنیشنل پولیو پلس کمیٹی دے چیئرمین مائیک میک گورن اَتے کے ایس ریلیف دے نمائندے ڈاکٹر زیاد میمش سودھے ݙوجھے اعلیٰ حکام شامل ہن۔
