اسلام آباد۔ 4 جولائی (اے پی پی) سپیکر قومی اسمبلی سردار ایاز صادق پاک افغان بارڈر تے بھارتی حمایت یافتہ فتنہ الخوارج دے خلاف کامیاب آپریشن تے سکیورٹی فورسز کوں خراج تحسین پیش کیتے۔ جمعہ کوں آپݨے سنیھے اچ انہاں فتنہ الخوارج دے 30 دہشت گرداں کوں جہنم واصل کرݨ تے سکیورٹی فورسز کوں شاباش ݙتی اَتے آکھیا جو دہشت گرداں دے خلاف بروقت اَتے مؤثر کارروائی سکیورٹی فورسز دی پیشہ ورانہ صلاحیتاں دا منہ بولیندا ثبوت اے۔ بھارتی پشت پناہی آلے دہشت گرداں کوں انجام تئیں پڄایا وینداپئے۔فتنہ الخوارج دے خاتمے کیتے سکیورٹی فورسز دے جرأت مندانہ اقدامات قابل ستائش ہن۔ قوم کوں آپݨے سکیورٹی اداریاں دی قربانیاں اَتے بہادری تے فخر اے۔ فتنہ الخوارج دے خلاف پوری قوم سکیورٹی فورسز نال کھڑی اے۔ قومی سلامتی دے تحفظ کیتے سکیورٹی فورسز دے اقدامات قابل تحسین ہن۔
