خانکندی۔ 4 جولائی (اے پی پی) اقتصادی تعاون تنظیم دے 17ویں سربراہی اجلاس دے موقع تے وزیراعظم محمد شہباز شریف آذربائیجان دے صدر الہام علیوف نال ݙو پاسہ ملاقات کیتی۔ وزیراعظم 17ویں ای سی او سربراہی اجلاس دی مثالی میزبانی تے آذربائیجان دے صدر کوں مبارخ ݙتی۔ وزیراعظم آفس دے پریس ونگ ولوں جاری پریس ریلیز موجب وزیراعظم محمد شہباز شریف 27 توں 29 مئی 2025 کوں آذربائیجان دے شہر لاچین دے اڄوکے دورے اچ پاکستانی وفد دی شاندار مزمان نوازی تے صدر علیوف اَتے آذربائیجان دے عوام نال اظہار تشکر کیتا۔ وزیراعظم بھارت نال اڄوکے تنازعے دے دوران پاکستان کیتے آذربائیجان دی مستقل حمایت تے صدر الہام دا شکریہ ادا کیتا۔ وزیراعظم آکھیا جو پاکستان وی اوکھے ویلھے آذربائیجان دی مسلسل حمایت کیتی اے۔ ملاقات اچ ݙوہیں رہنماواں ݙوہیں ملکاں وچال سرمایہ کاری دے امکانات بارے تھیوݨ آلی پیش رفت تے اطمینان کریندیں ہوئیں تجارت اَتے سرمایہ کاری دے شعبیاں اچ تعاون ودھاوݨ تے اتفاق کیتا۔ݙوہیں رہنماواں اقتصادی شراکت داری، خاص طور تے آذربائیجان دی پاکستان اچ سرمایہ کاری کوں ٻیا ودھاوݨ دا عزم کیتا۔ وزیراعظم آکھیا جو ݙوہیں ملکاں دی قیادت وچال اڄوکی گالھ مہاڑ آپس دے تعلقات دی ٻئی مضبوطی اچ مددگار ثابت تھئی اے۔ وزیراعظم صدر الہام کوں جلدی پاکستان دا دورہ کرݨ دی دعوت دا اعادہ وی کیتا۔
