عالمی امن کانفرنس دا انعقاد بین المذاہب ہم آہنگی اَتے امن کیتے پاکستان دے عزم دا مظہر اے، چیئرمین سینیٹ سید یوسف رضا گیلانی

وینس، اٹلی۔ 5 جولائی (اے پی پی) چیئرمین سینیٹ سید یوسف رضا گیلانی عالمی برادری تے زور ݙتے جو امن کیتے انصاف، مکالمہ اَتے انسانی وقار کوں ترجیح ݙیوے، عالمی امن کانفرنس دا انعقاد بین المذاہب ہم آہنگی اَتے امن کیتے پاکستان دے عزم دا مظہر اے۔ سینیٹ سیکرٹریٹ دے میڈیا ڈائریکٹوریٹ موجب اے ڳالھ انہاں وینس وچ عالمی امن کانفرنس توں اہم خطاب اچ آکھی ۔ “اڄ دے عالمی امن کوں درپیش چیلنجز” دے عنوان نال منعقدہ عالمی کانفرنس وچ پاکستان اَتے یورپی شخصیات شرکت کیتی۔یوسف رضا گیلانی آکھیا جو شہباز بھٹی کوں خراج عقیدت عالمی ضمیر کیتے قربانی دی علامت اے۔ چیئرمین سینیٹ آکھیا جو پاکستان پیپلز پارٹی ہمیشہ انصاف اَتے بین المذاہب ہم آہنگی دی علمبرداری کیتی اے۔ چیئرمین سینیٹ عالمی برادری توں اپیل کیتی جو امن کیتے انصاف، مکالمہ اَتے انسانی وقار کوں ترجیح ݙتی ونڄے۔ انہاں آکھیا جو امن صرف جنگ دا نہ ہووݨ کائنی بلکہ انصاف دی موجودگی اے۔ چیئرمین سینیٹ اپݨے پُتر دے اغوا دا ذاتی واقعہ بیان کرتے شرکاء کوں جذباتی کر ݙتا۔سید یوسف رضا گیلانی آکھیا جو عالمی طاقتاں مفادات نی، اخلاقی ذمہ داری دے تحت کردار ادا کرن۔ سید یوسف رضا گیلانی مسئلہ کشمیر دے حل کیتے عالمی ضمیر کوں متحرک کرݨ دی لوڑھ تے وی زور ݙتا ۔ انہاں آکھیا جو وینس کانفرنس، بین المذاہب ہم آہنگی اَتے امن کیتے پاکستان دے عزم دا مظہر اے۔ سید یوسف رضا گیلانی آکھیا جو اے کانفرنس کائنی ، ہک عالمی عہد اے۔