اسلام آباد۔ 5 جولائی (اے پی پی) وفاقی وزیر سائنس و ٹیکنالوجی خالد حسین مگسی وفاقی وزراء دے رلے نیشنل ڈیزاسٹر مینجمنٹ اتھارٹی (این ڈی ایم اے) دے ہیڈکوارٹر، اسلام آباد دا دورہ کیتا۔ ایں موقع تے چیئرمین این ڈی ایم اے لیفٹیننٹ جنرل انعام حیدر ملک وزراء کوں ملک اچ ہنگامی حالات اَتے آفتاں نال نبݨݨ وچ ادارے دے کثیر الجہتی کردار تے بریفنگ ݙتی۔وزارت سائنس اَتے ٹیکنالوجی ولوں جاری پریس ریلیز موجب ، چیئرمین این ڈی ایم اے پاکستان وچ بدلدے موسمی حالات اَتے آفتاں نال نبݨݨ سانڳے قومی سطح تے تیاری، رابطہ کاری اَتے وختی ردِعمل کوں مؤثر بݨاوݨ دیاں اتھارٹی دیاں فعال کوششاں تے روشنی پاتی۔ انہاں ہک جامع ڈیزاسٹر رسک مینجمنٹ فریم ورک اپناوݨ دی لوڑھ تے زور ݙتا تاں جو موسمیاتی تبدیلیاں توں پیدا تھیوݨ آلے ودھدے چیلنجز دا مؤثر انداز وچ مقابلہ کیتا ونڄ سڳے۔ایں موقع تے وفاقی وزیر خالد حسین مگسی وزیرِ اعظم محمد شہباز شریف دے وژن دے تحت این ڈی ایم اے دی مؤثر کارکردگی دی تعریف کیتی ۔ انہاں ادارے کوں جدید خطوط تے استوار کرݨ اَتے اوں کوں بین الاقوامی معیار دی ڈیزاسٹر مینجمنٹ ایجنسیاں دے طرز تے استوار کرݨ دی اہمیت تے زور ݙتا۔ وفاقی وزیر اے وی آکھیا جو آفتاں متعلق مسئلیں کوں قومی و علاقائی سطح تے ودھ مؤثر انداز وچ حل کرݨ کیتے صوبائی ڈیزاسٹر مینجمنٹ اتھارٹیز (پی ڈی ایم ایز) دے نال رابطیں اَتے تعاون کوں مزید تکڑا بݨاوݨ دی ٻہوں لوڑھ اے۔چھیکڑ اچ وفاقی وزیر این ڈی ایم اے دیاں کوششاں دی تعریف کیتی تے آفتاں نال وختی تے مربوط انداز وچ نبݨݨ کیتے ادارہ جاتی صلاحیت کوں تکڑا بݨاوݨ دے حکومتی عزم دا اعادہ کیتا
