اسلام آباد۔ 6 جولائی (اے پی پی) وزیرِ اعظم محمد شہباز شریف آکھیے جو یوم عاشورہ تاریخ اسلام دا ہک عظیم اَتے سبق آموز ݙینھ اے، جیڑھا اساکوں صبر، قربانی اَتے اصولاں تے ڈٹ ونڄݨ دی او عظیم مثال عطا کریندے جیڑھا قیامت تئیں انسانیت دے ضمیر کوں روشنی ݙکھیندا رہسی۔ وزیراعظم دفتر دے پریس ونگ ولوں جاری بیان موجب، وزیرِ اعظم محمد شہباز شریف یوم عاشورہ 1447ھ دے موقع تے اپݨے پیغام وچ آکھیے جو ݙاہ محرم الحرام کوں میدانِ کربلا وچ جیڑھا معرکہ تھیا، او کوئی عام معرکہ کائنی بلکہ رہندی دنیا تئیں ہک دائمی سنھیا اے۔نواسہ رسول حضرت امام حسین رضی اللہ عنہ اپݨے خاندان اَتے جانثار رفقاء دے رلے سچائی، عدل اَتے دین دی سر بلندی کیتے اپݨی جاناں دا نذرانہ پیش کیتا، مگر باطل دے سامݨے سِر نئیں جُھکایا۔ وزیراعظم آکھیا جو انہاں دی اِے عظیم قربانی اساکوں یاد ݙویندی اے جو اصولاں دی حفاظت اَتے حق تے ڈٹ ونڄݨ کیتے اُچا حوصلہ اَتے غیر متزلزل یقین دی لوڑھ ہوندی اے۔ انہاں آکھیے جو امام حسین دی شہادت توں اِے ڳالھ ݙینھ دی روشنی وانگوں صاف اے جو دین اسلام دی اصل روح انسانی وقار، عدل، رحم، اصول پرستی اَتے حریت وچ موجود اے۔وزیراعظم محمد شہباز شریف آکھیا جو واقعہ کربلا اساکوں اِے درس ݙیندے جو حق دا رستہ اوکھا اے، لیکن ایہو او رستہ اے جیڑھا اللہ تعالیٰ دی رضا، دل دے اطمینان اَتے دائمی فلاح دا ذریعہ بݨیندے۔ امام عالی مقام دا پیغام صرف انہاں دے ویلھے تئیں محدود کائںی، بلکہ ہک ہمہ گیر پیغام اے، جیڑھا اڄ وی اساکوں اِے یاد کرویندے جو مسلمان حق کیتے کھڑا تھیندے، مظلوم دا ساتھ ݙیندے، اَتے ہر حال وچ انصاف دی حمایت کریندے۔وزیراعظم محمد شہباز شریف آکھیا جو اڄ جݙاں اساݙی قوم کوں کئی چیلنجز دا سامݨا اے۔ بھاویں او معیشت ہووے، معاشرت ہووے یا قومی اتحاد، اساکوں امام حسین دی سیرت توں رہنمائی گھنݨ دی پہلے توں وی ودھ لوڑھ اے۔ اساکوں اپݨی قومی زندگی وچ دیانت، برداشت، صبر، قربانی اَتے اصول پسندی جیڑھے اوصاف کوں جاء ݙیوݨی ہوسی۔ انفرادی رویں توں ڳھن تے ریاستی پالیسیاں تئیں، جے اساں کربلا دی روشنی وچ اپݨا رستہ طے کروں، تاں پاکستان ہک ایجھی فلاحی، منصفانہ اَتے خوددار ریاست بݨ سڳدے جیڑھا نہ صرف اپݨے عوام دیاں امنگاں دی ترجمان ہووے بلکہ دنیا کیتے وی ہک مثال ہووے۔وزیراعظم آکھیا جو حضرت امام حسین دی عظیم قربانی پوری امت مسلمہ دا سانجھا سرمایہ اے۔ اساکوں چاھیدے جو ایں مقدس پیغام کوں وحدت دا ذریعہ بݨاؤں اَتے اپݨے معاشرے کوں محبت، رواداری اَتے خیر خواہی دا گہوارہ بݨاؤں۔ وزیراعظم محمد شہباز شریف آکھیا جو آؤ، اڄ یوم عاشورہ تے اساں اِے عہد کروں جو اساں اپݨی زندگیاں وچ حق و صداقت کوں اپݨا شعار بݨسوں۔ اساں ظلم دے خلاف آواز چیسوں اَتے اپݨے وطن کوں اوہو امن، عدل اَتے وقار عطا کرݨ دی کوشش کریسوں جیں دی جھلک سیدنا امام حسین دے روشن کردار توں مِلدی اے۔وزیراعظم محمد شہباز شریف آکھیا جو میݙی اِے دعا ہے جو اللہ تعالی پاکستان کوں امن، اتحاد اَتے ترقی دی رستے تے گامزن رکھے، اَتے ملک پاکستان کوں داخلی و خارجی فتنیاں توں محفوظ فرما تے استحکام نصیب فرماوے اَتے اساکوں او دانش اَتے حکمت عطا فرماوے جیں نال اساں ہک روشن اَتے باعزت مستقبل دے پاسے ودھ سڳوں ۔آمین
