اسلام آباد۔ 6 جولائی (اے پی پی) وزیر مملکت خزانہ و ریلوے بلال اظہر کیانی امام عالی مقام حضرت امام حسینؑ اَتے شہدائے کربلا کوں سلامِ عقیدت پیش کریندے آکھیا جو کربلا سچائی اَتے اصول دی خاطر عظیم ترین قربانی دی مثال اے جیڑھی رہندی دنیا تئیں انسانیت دی رہنمائی کریندی رہسی۔ انہاں یوم عاشور تے اپݨے پیغام وچ آکھیا جو حضرت امام حسینؑ اپݨی، اپݨے ٻالاں اَتے ساتھیاں دی جان قربان کر ݙتی، لیکن اسلام اَتے اوں دے ابدی اصول قربان نئیں تھیوݨ ݙتے.۔ بلال اظہر کیانی آکھیا جو امام حُسینؑ، اہلِ بیت اطہار اَتے انہاں دے جاں نثار ساتھی تاریخ وچ روشنی، سچائی اَتے بہادری دی انمٹ مثال بݨ تے ہمیشہ زندہ رہسن۔ بطور وزیراعظم دے ڈلیوری یونٹ دے سربراہ، بلال اظہر کیانی محرم الحرام اَتے یومِ عاشورہ دے موقع تے سیکیورٹی، صفائی، طبی امداد سودھے ݙوجھے انتظامات تے وفاقی اَتے صوبائی حکومتاں کوں خراجِ تحسین پیش کیتا۔ انہاں خاص طور تے پنجاب پولیس، ہسپتالاں، ریسکیو 1122، ستھرا پنجاب مہم، اَتے ضلعی انتظامیہ دے افسران اَتے عملے دی لازوال محنت اَتے عزم دی تعریف کیتی۔
