اسلام آباد۔ 6 جولائی (اے پی پی) وفاقی وزیر داخلہ محسن نقوی آکھیے جو واقعہ کربلا حق و سچ دی سرفرازی و سر بلندی دی عظیم ترین داستان اے، امام حسینؑ اپݨے قیمتی خون نال امت کیتے حق و باطل دی سرحد کوں تاقیامت واضح کر ݙتا۔ یزیدی طاقتاں اڄ فتنہ الہندوستان دے روپ وچ اپݨے مذموم عزائم دی تکمیل کیتے سازشاں وچ مصروف ہن، ساریں کوں امام حسینؑ دیاں درخشاں تعلیمات تے عمل کرتے یزیدی طاقتاں دے ناپاک عزائم کوں مٹی اچ رلاوݨا اے۔وفاقی وزیر داخلہ محسن نقوی یوم عاشور تے اپݨے پیغام وچ آکھیے جو امام حسینؑ اپݨے قیمتی خون نال امت کیتے حق و باطل دی سرحد کوں تاقیامت واضح کر ݙتا۔ امام حسینؑ ݙسایا جو ایمان دا رستہ صرف عمل نال روشن تھیندے۔ محسن نقوی آکھیا جو عاشورہ صرف تاریخ کائنی ، بیداری دا مرکز اے، جتھاں ایمان نیزیں کوں شکست ݙتی اَتے عظیم قربانی دین کوں بقا ݙتی۔ وزیر داخلہ آکھیا جو یزید بدمست طاقت دا ناں ہئی جیڑھا مِٹ ڳئے، حسینؑ حق و سچ دا چمکدا ستارہ جیڑھا ہمیشہ کیتے امر تھی ڳئے۔ انہاں آکھیا جو عاشورہ وچ پاݨی بند تھیا، لیکن امام حسینؑ او لازوال درس ݙتا جو ایمان کوں اڄ وی سیراب کریندا پئے۔وفاقی وزیر داخلہ آکھیا جو واقعہ کربلا حق و سچ دی سرفرازی و سربلندی دی عظیم ترین داستان اے، امام حسینؑ دا فلسفہ پوری انسانیت کیتے مشعلِ راہ اے۔ محسن نقوی آکھیا جو امام حسینؑ دی زندگی پیغام ݙیندی اے جو راہ حق وچ آوݨ آلیاں ساریاں آزمائشاں کوں برداشت کرݨا چاھیدے۔ انہاں آکھیا جو یزیدی طاقتاں اڄ فتنہ الہندوستان دے روپ وچ اپݨے مذموم عزائم دی تکمیل کیتے سازشاں وچ مصروف ہن۔ محسن نقوی آکھیا جو ساریں کوں امام حسینؑ دیاں درخشاں تعلیمات تے عمل کر تے یزیدی طاقتاں دے ناپاک عزائم کوں مٹی وچ مِلاوݨا اے۔ محسن نقوی آکھیا جو معرکہ کربلا پیغام ݙیندے جو اسلام دیاں اعلیٰ اقدار اَتے اصولاں کیتے کہیں وی قسم دی قربانی توں پچھوں نی ہٹݨا چاھیدا۔ انہاں آکھیا جو وطن عزیز کیتے ساریں کوں سانجھے اختلافات ختم کرتے باطل طاقتاں دے خلاف ہک تھیوݨا ہوسی۔ محسن نقوی دعا کیتی جو اللہ تعالی اساکوں اسوہ حسینؑ تے عمل کرݨ دی توفیق عطا فرماوے۔
