اسلام آباد۔ 6 جولائی (اے پی پی) چیئرمین سینیٹ سید یوسف رضا گیلانی یومِ عاشورہ (1447ھ / 2025ء) دے موقع تے اپݨے خصوصی پیغام وچ آکھیے جو یومِ عاشورہ تاریخِ اسلام دا او روشن باب اے جیڑھا صبر، استقامت، حوصلے، وفاداری، قربانی اَتے حق دی سربلندی دی عظیم مثالاں نال مزین اے۔ اِے ݙینھ امام عالی مقام حضرت امام حسین علیہ السلام اَتے انہاں دے جانثار رفقاء دی عظیم قربانی دی یاد تازہ کریندے، جنہاں باطل دے سامݨے سِر جُھکاوݨ دے بجائے راہِ حق وچ اپݨی جاناں دا نذرانہ پیش کیتا۔سینیٹ سیکرٹریٹ توں جاری خصوصی پیغام وچ چیئرمین سینیٹ آکھیا جو کربلا دا واقعہ محض ہک تاریخی سانحہ کائنی بلکہ ہک ایجھا ابدی پیغام اے جیڑھا رہندی دنیا تئیں انسانیت کوں ظلم دے خلاف کھڑے تھیوݨ، اصولاں تے ڈٹّ ونجݨ اَتے حق و انصاف کیتے ہر قربانی ݙیوݨ دی ترغیب ݙیندا رہسی۔ امام حسین علیہ السلام اپݨی شہادت نال امت کوں اِے سکھایا جو طاقت و اختیار دا معیار حق نی بلکہ حق اوہو اے جیڑھا عدل، سچائی اَتے اخلاقی جرأت تے قائم ہووے۔سید یوسف رضا گیلانی آکھیا جو یومِ عاشورہ اساکوں اِے عہد یاد ݙویندے جو اساں ظلم، ناانصافی، منافرت اَتے فرقہ واریت دے خلاف کھڑے تھیووں اَتے اپݨے معاشرے وچ رواداری، بھرپی ، سانجھے احترام اَتے اتحاد کوں ودھارا ݙیوں۔ امام حسینؑ دی سیرت اساکوں اِے پیغام ݙیندی اے جو مشکلات اَتے آزمائشاں دے باوجود حق دا علم بُلند رکھݨ ای اصل کامیابی اے۔ انہاں آکھیا جو یومِ عاشورہ دے موقع تے اساکوں سانجھی رواداری اَتے وحدتِ امت دا عملی مظاہرہ کرݨا اے تاں جو وطنِ عزیز وچ امن، سلامتی اَتے ہم آہنگی کوں ودھارا ݙتا ونڄ سڳے۔انہاں سارے اہل وطن توں اپیل کیتی جو ایں ݙینھ کوں اتحاد، یکجہتی اَتے قربانی دے پیغام دے طور تے مناوَن۔ آؤ اساں سارے امام حسینؑ دیاں تعلیمات توں رہنمائی گھندے ہوئیں ہک ایجھا معاشرہ تشکیل ݙیوں جیڑھا مظلوم دا سہارا اَتے ظالم دے خلاف ݙٹّ ونجݨ آلا ہووے۔ اللہ تعالیٰ پاکستان کوں امن، ترقی، اتحاد اَتے خوشحالی دا گہوارہ بݨاوے۔
