اسلام آباد۔ 6 جولائی (اے پی پی) وزیراعظم دے مشیر سیاسی امور رانا ثناء اللہ ملک وچ سیاسی اَتے انتخابی مسئلیں دے حل کیتے مذاکرات اَتے جمہوری تعاون تے زور ݙتے۔ اتوار کوں اپݨے ہک انٹرویو دے دوران انہاں آکھیا جو حکومت محاذ آرائی دے بجائے اتفاق رائے نال اڳوں ودھݨ تے یقین رکھیندی اے۔انہاں واضح کیتا جو پاکستان تحریک انصاف دے سابق چیئرمین عدالتی حراست وچ ہن اَتے کہیں وی ملاقات دی اجازت دا تعین وفاقی حکومت نی بلکہ عدالت کریندی اے۔ مخصوص نشستاں بارے خدشات دا جواب ݙیندے ہوئیں انہاں آکھیا جو ایں سلسلے وچ آئینی اَتے قانونی طریقہ کار دی پیروی کیتی ڳئی اے۔ انہاں آکھیا جو کجھ گروپاں دی ولوں ول ول الزاماں اَتے متضاد بیاناں اعتماد کوں کمزور اَتے جمہوری عمل کوں متاثر کیتے۔ انہاں ساریاں سیاسی جماعتاں تے زور ݙتا جو او پارلیمنٹ وچ واپس آوَن اَتے قومی مسئلیں دے حل کیتے تعمیری انداز وچ اپݨا کردار ادا کرن۔
