اسلام آباد۔ 7 جولائی (اے پی پی) چیئرمین سینیٹ سید یوسف رضا گیلانی کارگل جنگ دے عظیم ہیرو حوالدار لالک جان شہید (نشانِ حیدر) کوں 26ویں یومِ شہادت تے خراجِ عقیدت پیش کیتے۔ سنوار کوں سینیٹ سیکرٹریٹ توں جاری اعلامیے موجب چیئرمین سینیٹ آکھیا جو حوالدار لالک جان شہید دشمن دے ناپاک عزائم کوں ناکام بݨاوݨ کیتے جئیں جرأت، استقامت اَتے بہادری دا مظاہرہ کیتا او اساݙی قومی تاریخ دا ہک روشن باب اے، حوالدار لالک جان شہید آپݨی جان دا نذرانہ ݙے تے مادرِ وطن دے دفاع کوں یقینی بݨایا اَتے آوݨ آلی نسلاں کیتے شجاعت دا اعلیٰ ترین معیار قائم کیتا۔ سید یوسف رضا گیلانی آکھیا جو قوم کوں آپݨے ایجھیں بہادر سپوتاں تے فخر اے جنہاں مادرِ وطن دی حرمت تے جان نچھاور کرݨ توں وی دریغ نہ کیتا۔ انہاں آکھیا جو لالک جان شہید دا ناں تاریخِ پاکستان اچ ہمیشہ سنہری حروف اچ لکھیا ویسی۔ چیئرمین سینیٹ حوالدار لالک جان شہید دے درجات دی بلندی کیتے دعا کیتی۔
