اسلام آباد۔ 7 جولائی (اے پی پی) وزیر اعظم محمد شہباز شریف پاکستان دی تاریخ اچ پہلی واری ایف بی آر ولوں مصنوعی ذہانت (اے آئی) تے مبنی کسٹمز کلیئرنس اَتے رسک مینجمنٹ سسٹم (آر ایم ایس) متعارف کراوݨ دی تعریف کریندیں ہوئیں آکھیا جو ایں نال کاروبار اچ سوکھ اَتے ٹیکس ݙیوݨ آلیاں کیتے سہولت تھیسی جݙاں جو نظام اچ ٻئی شفافیت امسی۔وزیراعظم آفس دے میڈیا ونگ ولوں جاری بیان موجب وزیراعظم محمد شہباز شریف دی سربراہی اچ ایف بی آر دی جاری اصلاحات تے جائزہ اجلاس سنوار کوں تھیا۔ اجلاس اچ وفاقی وزراء محمد اورنگزیب، عطاء اللہ تارڑ، چیئرمین ایف بی آر اَتے متعلقہ اعلیٰ حکام شرکت کیتی۔وزیر اعظم نویں رسک مینجمنٹ نظام دی تشکیل کیتے کم کرݨ آلی ٹیم دے افسراں تے اہلکاراں دی تعریف کریندیں ہوئیں آکھیا جو جدید ٹیکنالوجی تے مبنی نظام نال کاروبار اچ سوکھ اَتے ٹیکس ݙیوݨ آلیاں کیتے سہولت تھیسی، ٹیکس نظام کوں خود کار بݨاوݨ نال اوں اچ شفافیت آویسی اَتے اونکوں ٻیا مؤثر بݨایا ویندا پئے۔ وزیراعظم نویں نظام کوں مربوط اَتے پائیدار بݨاوݨ دی ہدایت کریندیں ہوئیں آکھیا جو ایف بی آر دی اصلاحات حکومت دی پہلی ترجیحات اچ شامل ہن، انسانی مداخلت گھٹ تھیوݨ نال نظام ٻیا مؤثر ہوسی اَتے وقت تے پیسے دی بچت تھیسی۔ایں موقع تے وزیراعظم کوں بریفنگ اچ ݙسایا ڳیا جو نویں نظام دے تحت شئیں دی درآمد تے برآمد اچ لاگت اَتے نوعیت دا تخمینہ مصنوعی ذہانت (اے آئی) اَتے بوٹس (BOTS) کریسن، جدید ٹیکنالوجی تے مبنی نواں رسک مینجمنٹ سسٹم شئیں دی آمد تے رفت دے نال نال مشین لرننگ نال خودکار طریقہ کار نال بہتر تھیندا رہسی، نویں نظام دی ابتدائی ٹیسٹنگ اچ 92 فیصد توں ودھ بہتر کارکردگی سامݨے آئی۔ وزیراعظم کوں ݙسایا ڳیا جو نظام دی ابتدائی ٹیسٹنگ وچ نہ صرف ٹیکس وصولی کیتے 83 فیصد ودھ گڈز ڈیکلریشن (جی ڈی) دا تعین تھیا بلکہ اَݙھائی گُݨا ودھ گڈز ڈیکلریشن دی گرین چینل دے ذریعے کلیئرنس مکمل تھئی۔ نویں رسک مینجمنٹ سسٹم نال نظام اچ شفافیت آویسی، انسانی مداخلت گھٹ توں گھٹ ہوسی اَتے کاروباری لوکاں کوں سہولت تھیسی۔وزیراعظم کوں ݙسایا ڳیا جو نویں نظام دے اجراء نال شئیں دے تعین اَتے انہاں دی لاگت دا فوری اَتے مؤثر تخمینہ لڳسی جئیں نال ویلھے دی بچت تھیسی اَتے ایں دے اطلاق نال کسٹمز حکام تے دباؤ گھٹ تھیسی، نظام اچ شفافیت تے بہتری اَتے کاروباری لوکاں کوں سہولت مِلسی۔ اجلاس کوں مینوفیکچرنگ شعبے اچ ٹیکس وصولی ودھاوݨ کیتے ویڈیو اینالیٹکس تے مبنی اقدامات دا ݙسیا ڳیا۔ ایں نظام نال انہاں شعبیاں اچ ٹیکس دی وصولی خودکار اَتے شفاف انداز نال کیتی ونڄ سڳسی جئیں نال حکومتی آمدݨ اچ ودھسی اَتے ٹیکس ݙیوݨ آلے انسانی مداخلت دے بغیر آپݨا ٹیکس ادا کر سڳسن۔ اجلاس کوں اِے وی ݙسایا ڳیا جو اِیہ نظام لاگت اچ گھٹ اے اَتے ابتدائی ٹیسٹنگ اچ 98 فیصد ایفیشینٹ پاتا ڳیا۔ اجلاس کوں مینوفیکچرنگ شعبیاں اچ ایں نظام دے اطلاق دے بعد ٹیکس دی لاگت اچ وادھے دی استعداد بارے وی ݙسیا ڳئیا۔
