اسلام آباد۔ 7 جولائی (اے پی پی) وفاقی وزیر برائے خزانہ سینیٹر محمد اورنگزیب دی سربراہی اچ اجلاس اچ وزیراعظم دے پکھا تبدیلی پروگرام اَتے اوندے جلدی اجراء بارے تیاریاں دا جائزہ ڳِھدا ڳیا۔ سنوار کوں وفاقی وزارت خزانہ ولوں جاری بیان موجب اجلاس اچ وفاقی وزیر برائے توانائی سردار اویس احمد خان لغاری، گورنر سٹیٹ بینک آف پاکستان، چیئرمین پاکستان بینکس ایسوسی ایشن اَتے وزارت خزانہ، وزارت توانائی سودھے متعلقہ اداریاں دے سینئر حکام شرکت کیتی۔ اجلاس اچ وزیر خزانہ اَتے شرکاء کوں نیشنل انرجی ایفشینسی اَتے کنزرویشن اتھارٹی ولوں پروگرام دی عملی تیاریاں اَتے متوقع آغاز بارے تفصیلی بریفنگ ݙتی ڳئی۔ بینکاں دے نال معاہدیاں دی تکمیل، بینکنگ سسٹمز دے انضمام اَتے نیشنل انفارمیشن ٹیکنالوجی کمپنی اَتے پنجاب انفارمیشن ٹیکنالوجی بورڈ دی فنی معاونت اَتے سلوشنز دے ذریعے عمل درآمد کوں تکھا کرݨ سویں اہم نکات دا تفصیلی جائزہ ڳِھدا ڳیا۔ سینیٹر محمد اورنگزیب وزیراعظم دی ایں منصوبے تے خصوصی توجہ کوں اُجاگر کریندیں ہوئیں آکھیا جو اِے پروگرام توانائی دی بچت، مالی شمولیت دے فروغ اَتے معیشت دے استحکام اچ اہم کردار ادا کریسی۔ انہاں دا آکھݨ ہا جو ایں نال صارفاں دے رویے اچ مثبت تبدیلی آویسی، بجلی دی کھپت اچ کمی ہوسی اَتے مجموعی طور تے ملکی معیشت کوں فیدہ تھیسی۔وزیر خزانہ سارے سٹیک ہولڈرز خاص طور تے بینکاری شعبے دی بھرپور شرکت اَتے تعاون کوں سراہیا اَتے ہدایت ݙتی جو آوݨ آلے ݙو توں ترائے ہفتیاں اچ سارے ضروری اقدامات مکمل کیتے ونجن تاں جو مہینے دے اختتام تئیں پروگرام دے پہلے مرحلے دا تیار بینکاں دی شمولیت نال آغاز ممکن بݨایا ونڄ سڳے۔ اجلاس اچ سارے شرکاء حکومت دے معاشی تے توانائی شعبے اچ اصلاحاتی ایجنڈے دے تحت پروگرام دی بروقت اَتے مؤثر تکمیل دے عزم دا اعادہ کیتا۔
