اسلام آباد۔ 7 جولائی (اے پی پی) وزیراعظم محمد شہباز شریف اڄوکی بارشاں اچ کہیں وی قسم دی ہنگامی صورتحال نال نٻڑݨ کیتے این ڈی ایم اے، ریسکیو اداریاں اَتے انتظامیہ کوں ہائی الرٹ رہݨ دی ہدایت کریندیں ہوئیں آکھیا جو عوام کوں صورتحال بارے ویلھے تے مطلع کیتا ونڄے اَتے متعلقہ اداریاں وچال رابطے مضبوط بݨائے ونجن۔سنوار کوں وزیراعظم آفس دے میڈیا ونگ توں جاری بیان موجب وزیراعظم دریائے سندھ اَتے ݙوجھے دریاواں نال ملحقہ علاقیاں اچ ممکنہ سیلابی صورتحال پاروں این ڈی ایم اے، ریسکیو اداریاں اَتے انتظامیہ کوں فوری حفاظتی انتظامات تے اقدامات یقینی بݨاوݨ دی ہدایت کیتی۔ انہاں این ڈی ایم اے کوں صوبائی ڈیزاسٹر مینجمنٹ اتھارٹیز (پی ڈی ایم ایز) دے نال سیلابی صورتحال نال نبڑݨ کیتے تعاون کوں ٻیا مربوط بݨاوݨ اَتے صوبائی حکومتاں اَتے ݙوجھے متعلقہ اداریاں نال قریبی رابطے مضبوط بݨاوݨ دی وی ہدایت کیتی۔وزیراعظم حکم ݙتا جو پاکستان ٹیلی کمیونیکیشن اتھارٹی (پی ٹی اے) عوام کوں آگاہ رکھݨ کیتے سارے دستیاب ذریعیاں توں حقیقی تے تازہ صورتحال دی فراہمی کوں یقینی بݨاوے۔ وزیراعظم آکھیا جو تربیلا ڈیم سپل وے آپریشن نال دریائے سندھ دے زیریں ضلعیاں اچ طغیانی ودھݨ دا خطرہ اے، سارے صوبیاں دی انتظامیہ سیلابی صورتحال پاروں عوام کیتے مؤثر آگاہی مہم جاری رکھن۔ وزیراعظم ہدایت کیتی جو نیشنل ایمرجنسی آپریشن سنٹر (این ای او سی) میڈیا دے ذریعے غیر محفوظ اَتے ڳھٹ محفوظ علاقیاں دی وضاحت کرے جتھاں تے اُچے، وچلے اَتے گھٹ درجے دے سیلاب دا خطرہ اے تانجو عوام کوں بروقت خبردار کیتا ونڄ سڳے۔ وزیراعظم صوبیاں دی انتظامیہ کوں کہیں وی صورتحال توں پہلے نبڑݨ کیتے آپݨی تیاری مکمل رکھݨ اَتے این ڈی ایم اے کوں ایں امر کوں یقینی بݨاوݨ دی ہدایت وی کیتی۔
