اسلام آباد۔ 7 جولائی(اے پی پی)وزیراعظم محمد شہباز شریف اتصالات گروپ کوں پاکستانی معیشت دے مختلف شعبیاں اچ ٻئی سرمایہ کاری کرݨ دی دعوت ݙیندے آکھیے جو اماراتی کمپنیاں سودھا سارے بیرونی سرمایہ کار کمپنیاں کوں ملک اچ کاروبار دوست ماحول ݙیوݨ اَتے سرمایہ کاری دے ودھ مواقع ݙیوݨ وݙی ترجیح اے۔ وزیراعظم محمد شہباز شریف نال اماراتی ٹیلی کمیونیکیشن کمپنی اتصالات گروپ دے سی ای او حاتم ݙوئیدار دی سربراہی اچ پنج رکنی وفد ملاقات کیتی۔ وزیراعظم اتصالات گروپ کوں پاکستانی معیشت دے مختلف شعبیاں اچ مزید سرمایہ کاری کرݨ دی دعوت ݙتی۔ انہاں آکھیا جو حکومت ایں سانڳے ساریاں سہولتاں ݙیسی، متحدہ عرب امارات اَتے پاکستان وچال مشترکہ ثقافت، بھرا ٻھرپی اَتے مذہبی اقدار دے دیرینہ تعلقات ہین، اماراتی کمپنیاں پاکستانی معیشت اچ وݙے عرصے توں سرمایہ کاری کرینداں پئین، اماراتی کمپنیاں سودھا سارے بیرونی سرمایہ کار کمپنیاں کوں ملک اچ کاروبار دوست ماحول اتے سہولتاں ݙیوݨ ترجیح اے۔ سی ای او حاتم ݙوئیدار حالیہ حکومتی سرمایہ دوست پالیسیاں پاروں بین الاقوامی کمپنیاں کیتے پاکستان اچ بہتر کاروباری ماحول ݙیوݨ تے وزیراعظم کوں خراج تحسین پیش کیتا۔ انہاں آکھیا جو اتصالات گروپ پاکستان اچ گزریل 19 سال توں کامیاب سرمایہ کاری کریندا پئے اَتے مزید کاروبار اَتے سرمایہ کاری چاہندے، اساݙی کمپنی اچ ݙاہ ہزار توں ودھ پاکستانی قابل قدر خدمات ݙیندے پئن، اساں پاکستان اچ مستقبل کیتے طویل مدتی اَتے کامیاب سرمایہ کاری کیتے پرعزم ہیں۔ ملاقات اچ نائب وزیراعظم و وزیر خارجہ محمد اسحاق ݙار، وزیر خزانہ محمد اورنگزیب، وزیر آئی ٹی شزا فاطمہ خواجہ اَتے متعلقہ اداریاں دے اعلیٰ افسران شریک ہن۔
