اسلام آباد۔ 7 جولائی(اے پی پی)وفاقی وزیر برائے خزانہ و محصولات سینیٹر محمد اورنگزیب دی سربراہی اچ نیشنل ٹیرف پالیسی تے عملدرآمد کیتے قائم سٹیئرنگ کمیٹی دا اجلاس وزارت خزانہ اچ تھیا۔ اجلاس اچ وفاقی وزیر برائے تجارت جام کمال خان، وزیر برائے پٹرولیم علی پرویز ملک، گورنر سٹیٹ بینک آف پاکستان اَتے وزارت خزانہ سودھا ٻیاں متعلقہ وزارتاں، ݙویژناں اَتے اداریاں دے اعلیٰ حکام شرکت کیتی۔ اجلاس اچ وزیر خزانہ پائیدار ٹیرف اصلاحات دی اہمیت تے زور ݙیندے آکھیا جو نیشنل ٹیرف پالیسی پاکستان دی تجارتی پالیسی دا بنیادی ستون اے۔ انہاں واضح کیتا جو اے پالیسی اڳلے پنج سالاں اچ تجارت کوں آزاد بݨاوݨ، برآمدات اچ وادھے اَتے ملکی صنعت دی مسابقتی صلاحیت کوں بہتر بݨاوݨ کیتے ہک مربوط روڈ میپ ݙیندی اے۔ سینیٹر اورنگزیب آکھیا جو وزیراعظم دی ہدایت تے ٻݨی ایں سٹیئرنگ کمیٹی کوں اے ذمہ واری ݙتی ڳئی اے جو او پالیسی تے عملدرآمد، زرمبادلہ دے ذخائر دی صورتحال اَتے صنعتی شعبے دی مرحلہ وار منتقلی دی مسلسل نگرانی کرے اَتے ایںدے اچ رہنمائی ݙیوے۔ اجلاس اچ وزارت کامرس دے ماتحت ادارے نیشنل ٹیرف کمیشن اپݨیاں ذمہ واریاں، کارکردگی اَتے حالیہ اقدامات تے تفصیلی بریفنگ ݙتی۔ کمیشن مقامی صنعت کوں غیر منصفانہ تجارتی رویاں جیڑھے جو ݙمپنگ، سبسڈی یافتہ درآمدات اَتے نقصان ݙیوݨ آلے درآمدی وادھے توں بچاوݨ کیتے ٹیرف دی معقول ساخت اَتے قانونی اقدامات دا ݙسایا۔ شرکاء کوں ادارہ جاتی صلاحیت ودھاوݨ بارے اقدامات دا وی ݙسایا ڳیا۔ وزیر خزانہ نیشنل ٹیرف کمیشن دے کردار دی تعریف کریندے اینکوں مقامی صنعت کیتے مساوی مواقع ݙیوݨ تے توجہ ݙیوݨ دی ہدایت کیتی۔ انہاں کمیشن کوں درپیش وسائل دے مسئلے حل کرݨ اچ تعاون دی یقین دہانی کرائی اَتے اینٹی ݙمپنگ نظام کوں ٻیا تکڑا بݨاوݨ دی اہمیت تے زور ݙیتا اتے آکھیا جو کمیشن کوں اپݨے دائرہ کار اچ توسیع دے بجائے ہک چُست، مؤثر اَتے بین الاقوامی معیار دے مطابق ادارہ بݨاوݨ دی کوشش کرݨی چاھیدی اے جیڑھی عالمی تجارتی تنظیم ݙبلیو ٹی او دے قواعد دے مطابق ہووے۔ اجلاس اچ شرکاء سارے اداریاں دے باہمی تعاون نال نیشنل ٹیرف پالیسی دے مؤثر نفاذ کیتے کم کرݨ اَتے پاکستان دی تجارتی مسابقت اَتے صنعتی ترقی کوں فروغ ݙیوݨ دے عزم دوہرایا۔
