کراچی۔ 8 جولائی (اے پی پی) وفاقی وزیر داخلہ محسن نقوی آکھیا جو ٻاہرلے ملک توں ڈی پورٹ تھی تے آوݨ آلے بھکاریاں دی گرفتاری یقینی بݨائی ونڄے، مفرور ایجنٹس کوں ݙوجھے صوبیاں دے تعاون نال گرفتار کیتا ونڄے، جعلی دوائیں دے کاروبار اچ ملوث لوکاں دی اصل جاہ جیل اے۔ اے ڳالھیں انہاں منگل کوں ایف آئی اے کراچی زون دے اجلاس دی صدارت کریندیں ہوئیں کیتا جئیں اچ ایڈیشنل ڈائریکٹر جنرل ایف آئی اے ساؤتھ مجاہد اکبر خان، ڈائریکٹر ایف آئی اے کراچی زون نعمان صدیق، ڈپٹی ݙائریکٹر اینٹی منی لانڈرنگ، ڈپٹی ڈائریکٹر امیگریشن، ڈپٹی ݙائریکٹر اینٹی کرپشن، سارے اسسٹنٹ ڈائریکٹرز اَتے ایف آئی اے ساؤتھ دے حکام وی شریک ہن۔ ڈائریکٹر کراچی زون نعمان صدیق وزیر داخلہ کوں بریفنگ ݙتی اَتے انہاں کوں ایف آئی اے کراچی زون دی کارکردگی اَتے ایشوز بارے ݙسیا۔ وزیر داخلہ حوالہ ہنڈی مافیا دے خلاف مؤثر کریک ڈاؤن دا حکم ݙیندیں ہوئیں آکھیا جو ایں اچ ملوث وݙے وݙے لوکاں تے ہتھ پاتا ونڄے، کہیں دا دباؤ قبول کیتے بغیر مافیا دے خلاف بلا امتیاز کارروائی کیتی ونڄے۔ محسن نقوی بھکاریاں کوں بیرون ملک بھیڄݨ آلے ایجنٹ مافیا دی سرکوبی دا حکم ݙیندیں ہوئیں آکھیا جو بھکاری مافیا پاکستان دے امیج کوں خراب کریندا پئے، ایجنٹس دے خلاف بلاامتیاز ایکشن نظر آوݨا چاھیدے، مفرور ایجنٹس کوں ݙوجھے صوبیاں دے تعاون نال گرفتار کیتا ونڄے۔ انہاں دا آکھݨ ہا جو جعلی دوائیں دا کاروبار کہیں صورت برداشت نہ کیتا ویسی، ایں مکروہ دھندے اچ ملوث لوکاں نال آہنی ہتھاں نال نبڑیا ونڄے، جعلی دوائیں دے کاروبار اچ ملوث لوکاں دی اصل جاہ جیل اے۔ انہاں نان کسٹمز مصنوعات دے خلاف بھرپور کارروائی دی ہدایت وی کیتی۔ وزیر داخلہ 5 ہزار توں ودھ ݙالر ٻاہرلے ملک ڳِھن ونجݨ آلے مسافراں دے خلاف سخت ایکشن ݙیندیں ہوئیں ایف آئی اے حکام کوں ہدایت کیتی جو ایجھیں بندیاں دے خلاف قانون دے مطابق بھرپور کارروائی کیتی ونڄے۔
