اسلام آباد۔ 8 جولائی (اے پی پی) وفاقی حکومت دے ڈھانچے دی تنظیمِ نو بارے کابینہ کمیٹی دا اجلاس منگل کوں وزارتِ خزانہ اچ وفاقی وزیر برائے خزانہ تے ریونیو سینیٹر محمد اورنگزیب دی سربراہی اچ تھیا۔ اجلاس اچ وفاقی وزیر برائے توانائی سردار اویس احمد خان لغاری اَتے متعلقہ وزارتاں اَتے ڈویژناں دے سینئر حکام شرکت کیتی۔اجلاس اچ پاور ڈویژن پاور پلاننگ اینڈ مانیٹرنگ کمپنی بارے تفصیلی بریفنگ ݙتی، جئیں اچ ادارے دی ساخت، اہم ذمہ واریاں، نمایاں کامیابیاں، اَتے مستقبل دے منصوبے پیش کیتے ڳئے۔ پریزنٹیشن اچ ایں کمپنی کوں بجلی دے شعبے وچ منصوبہ بندی اَتے کارکردگی دی مانیٹرنگ دے ہک مضبوط تکنیکی ادارے دے طور تے مستحکم بݨاوݨ خاص طور تے سائنسی انداز اچ پیشگوئی، نظام دی بہتری، اَتے بین الشعبہ جاتی ہم آہنگی تے توجہ ݙیوݨ تے زور ݙتا ڳیا۔ کابینہ کمیٹی کوں لا ڈویژن وی آپݨی ذمہ واریاں، کارکردگی دے معیاراں، جاری تنظیمِ نو دیاں سرگرمیاں اَتے انہاں دے عوامی پالیسی اَتے سروس ڈیلیوری تے اثرات بارے ابتدائی بریفنگ ݙتی جئیں اچ ماتحت اداریاں دا جائزہ اَتے ادارہ جاتی استعداد بہتر بݨاوݨ، اختیارات دی دہرا پن ختم کرݨ، اَتے بہتر نتائج کیتے سادہ اَتے مؤثر انتظامی ڈھانچے دی تجویزاں شامل ہن۔ اُنہاں توں علاوہ کمیٹی جناب سلمان احمد، ایمبیسیڈر ایٹ لارج دی سربراہی اچ ٻݨی سب کمیٹی ولوں ریونیو ڈویژن بارے ادارہ جاتی اصلاحات تے مشتمل سفارشات تے وی بحث کیتی۔ سفارشات اچ انتظامی ڈھانچے کوں زیادہ مؤثر بݨاوݨ، انسانی وسائل دے بہتر استعمال، اَتے قومی ترجیحات نال ہم آہنگی کوں مضبوط بݨاوݨ تے زور ݙتا ڳیا۔ کارکردگی تے مبنی نظامِ حکومت اَتے احتساب دے مؤثر نظام دی مدد نال عوامی خدمات دی بہتری دی راہ ہموار کرݨ تے وی خاص زور ݙتا ڳیا۔ اجلاس دی صدارت کریندیں ہوئیں وزیر خزانہ آکھیا جو فیڈرل بورڈ آف ریونیو پاکستان دے مالیاتی نظام اچ ریڑھ دی ہݙی دی حیثیت رکھیندے۔ انہاں آکھیا جو حکومت وزیراعظم دی زیر نگرانی ایف بی آر اچ اصلاحات دے منصوبے تے مکمل عزم نال عملدرآمد کریندی پئی اے تاں جو ٹیکس وصولی کوں ودھا تے مالیاتی خودکفالت حاصل کیتی ونڄ سڳے اَتے ایف بی آر کوں ہک جدید، مؤثر اَتے جواب دہ ادارہ بݨایا ونڄ سڳے۔ وزیر خزانہ ایں گالھ تے وی زور ݙتا جو ایف بی آر دے نظام اچ کارکردگی تے مبنی انسانی وسائل دی پالیسیاں کوں اپنایا ونڄے تاں جو سرکاری اخراجات دا ہر روپیہ ٹیکس وصولی، قانون تے عملدرآمد اَتے عوامی سہولت دی شکل وچ واضح بہتری دا باعث بݨے۔
