اسلام آباد۔ 8 جولائی (اے پی پی) وزیراعظم محمد شہباز شریف ملک اچ زرعی پیداوار ودھاوݨ اَتے زرعی اصلاحات کیتے جامع لائحہ عمل طلب کریندیں ہوئیں آکھیا جو زرعی شعبے دی پیداوار اچ بہتری، ویلیو ایݙیشن اَتے زرعی مصنوعات دی برآمدات ودھاوݨ حکومت دی پہلی ترجیح اے، زرعی اجناس دی فی ایکڑ پیداوار اچ وادھے کیتے زرعی شعبے دے تحقیقی مرکزاں کوں ٻیا فعال بݨایا ونڄے۔ منگل کوں وزیراعظم آفس دے میڈیا ونگ توں جاری بیان موجب وزیراعظم شہباز شریف دی سربراہی اچ زرعی شعبے دی کارکردگی اَتے جاری اصلاحات تے جائزہ اجلاس تھیا۔ اجلاس اچ وفاقی وزیرِ غذائی تحفظ رانا تنویر حسین، زرعی شعبے دے ماہرین اَتے متعلقہ اعلیٰ حکام شرکت کیتی۔ اجلاس کوں ربیع تے خریف دی وݙیاں فصلاں دی گزریل سال دی پیداوار، کساناں کوں درپیش مسئلیاں، آوݨ آلے لائحہ عمل اَتے تجویزاں پیش کیتی ڳئی۔ اجلاس کوں حکومتی اصلاحات دے نفاذ تے پیشرفت اَتے زراعت تے موسمیاتی تبدیلی دے اثرات بارے وی ݙسیا ڳئیا۔ زرعی شعبے تے ٻݨیے ٹاسک فورس ولوں بریفنگ ݙتی ڳئی۔وزیراعظم ہدایت کیتی جوجدید زرعی مشینری، معیاری بیج، فصلاں دی جغرافیائی منصوبہ بندی اَتے کساناں کوں سوکھی شرطاں تے قرضیاں دی فراہمی کیتے اقدامات دا طویل تے گھٹ مدتی جامع لائحہ عمل پیش کیتا ونڄے۔ زرعی اجناس دی فی ایکڑ پیداوار اچ وادھے کیتے زرعی شعبے دے تحقیقی مرکزاں کوں ٻیا فعال بݨایا ونڄے۔ زرعی تحقیقی مرکزاں اچ پبلک پرائیویٹ پارٹنرشپ دے تحت جدید تحقیق کوں یقینی بݨایا ونڄے۔ زراعت اچ مصنوعی ذہانت اَتے جدید ٹیکنالوجی دے مؤثر استعمال کیتے بین الاقوامی شہرت یافتہ ماہرین دی خدمات توں فائدہ ڳِھدا ونڄے۔ زرعی اجناس دی ویلیو ایڈیشن نال برآمدی شئیں دی تیاری کیتے نِکے اَتے درمیانے درجے دی زرعی صنعت دی ترقی بارے اقدامات دا لائحہ عمل وی پیش کیتا ونڄے۔ منافع بخش فصلاں دی کاشت اَتے پاکستان کوں غذائی تحفظ بارے خود کفیل بݨاوݨ کیتے کساناں کوں ہر قسم دی رہنمائی فراہم کرݨ دے اقدامات کیتے ونجن۔ کساناں اَتے ݙوجھے سٹیک ہولڈرز نال تجویزاں کیتے مشاورتی عمل کوں یقینی بݨایا ونڄے۔ زرعی شعبے دی ترقی کیتے صوبائی حکومتاں نال رابطے تے تعاون ٻیا مربوط بݨایا ونڄے۔ موسمیاتی تبدیلیاں دے مضر اثرات توں بچݨ کیتے کلائیمیٹ رزسٹینٹ بیج اَتے زراعت دے جدید طریقہ کار اپناوݨ اچ کساناں دی معاونت کیتی ونڄے۔ بارشاں اَتے ݙوجھیاں موسمیاتی تبدیلیاں پاروں نویں موزوں علاقیاں خاص طور تے سندھ اَتے بلوچستان اچ کپاہ دی کاشتکاری کیتے صوبائی حکومت نال تفصیلی مشاورت دے بعد جامع منصوبہ بندی کیتی ونڄے۔ نباتاتی ایندھن کوں ملک دے انرجی مکس اچ شامل کرݨ کیتے تحقیق اَتے منصوبہ بندی کیتی ونڄے اَتے زرعی شعبے اچ ٻئی اصلاحات کیتے جامع لائحہ عمل جلدی پیش کیتا ونڄے۔
