اسلام آباد۔ 8 جولائی (اے پی پی)وزیراعظم محمد شہباز شریف آکھیے جو استحکام دے بعد ہدف ملکی معیشت دی ترقی، برآمدات ودھاوݨ، روزگار ݙیوݨ، صنعتی ترقی اَتے بیرونی سرمایہ کاری ودھاوݨ اے، ترقی دا اے پندھ ساکوں رل تے محنت اَتے باہمی تعاون نال طے کرݨے۔ وزیراعظم محمد شہباز شریف نال صنعتی شعبہ دیاں معروف کاروباری شخصیات ملاقات کیتی اتے معیشت و صنعت دی ترقی، برآمدات اچ ودھارے اتے کاروباری برادری دے مسئلیاں دے حل تے مشاورت کیتی ڳئی۔ ملک دیاں معروف کاروباری شخصیات ملکی معاشی استحکام اتے وزیراعظم دی قیادت اَتے حکومتی معاشی ٹیم دیاں کوششاں دی تعریف کیتی۔ وزیراعظم محمد شہباز شریف آکھیا جو معاشی استحکام دا سہرا حکومتی ٹیم دی انتھک محنت کوں ویندے، استحکام دے بعد ہدف ملکی معیشت دی ترقی، برآمدات اچ وادھا، روزگار ݙیوݨ، صنعتی ترقی اَتے ملک اچ بیرونی سرمایہ کاری اچ ودھارا اے۔ انہاں آکھیا جو ہݨ ساکوں مقامی سطح تے وسائل استعمال کریندے ہوئیں معیشت دی ترقی نال پاکستان کوں خود کفیل بݨاوݨے، کاروباری برادری ولوں ملکی معاشی ترقی کیتے تجویزاں اہم ہین، ہر مہینے کاروباری برادری نال باقاعدگی نال مل تے تے انہاں کوں ملکی معاشی ترقی کیتے مشاورتی عمل دا حصہ بݨیساں، پُرامید ہاں جو اساݙیاں آوݨ والیاں ملاقاتاں وی اڄ دی ملاقات وانگوں با معنی اَتے نتیجہ خیز ہوسن۔ وزیراعظم آکھیا جو ہر شعبے دے حوالے نال نجی کاروباری نمائندیاں و ماہرین نال مشاورت کیتی ویسی۔ شرکاء وزیراعظم دی قیادت اچ معاشی استحکام تے حکومتی ٹیم دیاں کوششاں دی تعریف کیتی۔ شرکاء آکھیا جو بجٹ عوام دوست اَتے کاروبار اچ سہولت کیتے درست قدم اے، حکومتی پالیسیاں دی کاروبار، سرمایہ کاری اَتے صنعتی شعبے دیاں ضرورتاں نال ہم آہنگی اہم اے، پاکستان اچ بیرونی سرمایہ کاری ودھاوݨ کیتے سرمایہ کاراں اَتے برآمد کنندگان کوں ودھ سہولتاں ݙیوݨ ضروری اے۔ شرکاء وزیراعظم دے صنعتی ترقی کیتے پالیسی سازی وچ نجی شعبے دیاں تجویزاں دی شمولیت دے اقدام دی پذیرائی کیتی۔ اجلاس اچ حکومتی ارکان وزیراعظم اَتے شرکاء کوں بریفنگ ݙتی جو بجٹ اچ دستیاب وسائل دے مطابق عام آدمی، کاروباری برادری اَتے سرمایہ کاراں کوں سہولت ݙتی ڳئی، پاکستان اچ سرمایہ کاری اَتے صنعتاں کوں وسعت ݙیوݨ دی وݙی استعداد موجود اے، حکومتی ٹیم نجی شعبے دے نال حکومتی پالیسیاں اچ سہولت دی آگاہی اَتے رابطے ٻئے تکڑے کرݨ کیتے کوشاں اے۔ پاکستان اوکھے ویلھے توں نِکل تے ترقی دے سفر تے ٹردا پئے، کاروباری برادری دی برآمدات دی عالمی منڈیاں اچ مسابقت کیتے تیاری دی لاگت بشمول بجلی دیاں قیمتاں اچ مزید کمی کیتے اقدامات جاری ہین، ایف بی آر دی ݙیجیٹلائزیشن نال کاروبار و سرمایہ کاری کیتے مزید آسانی گھن آئی ویندی پئی اے، حکومتی حجم کوں گھٹ کرݨ کیتے سرکاری اداریاں دی نجکاری تے کم وی تھیندا پئے، ملکی تاریخ اچ پہلی واری انفارمیشن ٹیکنالوجی دا جدید ایکوسسٹم متعارف کرایا ویندا پئے۔ ملاقات اچ ٹیکسٹائل، زراعت، سیمنٹ، انفارمیشن ٹیکنالوجی سودھا نجی شعبے دیاں معروف کاروباری شخصیات شرکت کیتی۔ وفاقی وزراء رانا تنویر حسین، محمد اورنگزیب، عطاء اللہ تارڑ، سردار اویس خان لغاری، علی پرویز ملک، شزہ فاطمہ خواجہ، حنیف عباسی، جنید انور چوہدری، وزیراعظم دے زراعت کیتے کوآرڈینیٹر احمد عمیر، چیئرمین ایف بی آر اَتے متعلقہ اعلیٰ حکام وی ملاقات وچ شریک ہن۔
