مقبوضہ بیت المقدس۔ 9 جولائی (اے پی پی) فلسطینی قیدیاں دی رہائی کیتے مہم چلاوݨ آلے ایڈووکیسی گروپس دا آکھݨ ہا جو ایں ویلھے اسرائیلی جیلاں اچ فلسطین توں تعلق رکھݨ آلے 10 ہزار توں ودھ قیدی موجود ہن، اِے 2000 اچ ݙوجھی انتفاضہ دے بعد اسرائیل اچ فلسطینی قیدیاں دی سب توں وݙی تعداد اے۔ عرب نیوز موجب جولائی دے آغاز تئیں اسرائیل دے حراستی مرکزاں اَتے جیلاں اچ تقریباً 10 ہزار 800 قیدی موجود ہن، انہاں اچ 50 تریمتاں وی شامل ہن جنہاں وچوں ݙو دا تعلق غزہ دی پٹی توں اے جݙاں جو 450 توں ودھ بال وی قید ہن۔ اعداد و شمار اچ او بندے شامل کائنی جو اسرائیل دے فوجی کیمپاں اچ زیرِ حراست ہن جیڑھے جو غزہ دے بہوں سارے رہائشیاں بارے خیال کیتا ویندے جو او حراست اچ ہن اَتے انہاں کوں تشدد دا نشانہ بݨایا ویندے۔ایں ویلھے اسرائیل ولوں مجموعی طور تے 3 ہزار 629 فلسطینیاں کوں ہک حکم نامے دے تحت انتظامی حراست اچ رکھیا ڳئے۔ اے حکم نامہ اسرائیلی حکام کوں کہیں وی قیدی کوں چھی مہینے تئیں بغیر کہیں مقدمے دے قید اچ رکھݨ دی اجازت ݙیندے اَتے اوں دی غیر معینہ مدت تئیں تجدید وی تھی سڳدی اے۔ انہاں اچ 2 ہزار 454 ایجھیں بندے وی ہن جنہاں دا تعلق لبنان، شام اَتے بعض ݙوجھے عرب ملکاں توں اے اَتے انہاں کوں جنگی قیدیاں دا درجہ حاصل نئیں۔اقوام متحدہ دی 2023 دی ہک رپورٹ موجب غزہ دی پٹی، مغربی کنارے اَتے مشرقی یروشلم تے 1967 اچ تھیوݨ آلے قبضے دے بعد 8 لکھ توں ودھ فلسطینی مختلف اوقات اچ اسرائیلی جیلاں اچ قید رہ چُکین۔
