اسلام آباد۔ 9 جولائی (اے پی پی) نائب وزیراعظم تے وزیر خارجہ سینیٹر محمد اسحاق ڈار قومی معیشت اچ کپاہ دے مرکزی کردار دی بحالی اَتے کاشتکاراں کیتے فصل دے منافع کوں بہتر بݨاوݨ کیتے مربوط اَتے قابل عمل اقدامات دی لوڑھ تے زور ݙتے۔ ترجمان دفتر خارجہ ولوں بدھ کوں جاری پریس ریلیز موجب اے ڳالھیں انہاں ضروری اَتے نقد آور فصلاں بارے کابینہ کمیٹی دے تریجھے اجلاس دی صدارت اچ کیتا۔ اجلاس اچ کمیٹی کاٹن پلان 26-2025 دا تفصیلی جائزہ ڳِھدا اَتے پاکستان اچ کپاہ دے شعبے دی بحالی کیتے ضروری اَتے فوری، وسط تے طویل المدتی پالیسی اقدامات تے خصوصی غور کیتا۔ وزارت نیشنل فوڈ سکیورٹی اینڈ ریسرچ کوں ہدایت کیتی ڳئی جو آوݨ آلے ہفتے فالو اپ اجلاس سݙیا ونڄے جئیں اچ کاٹن ویلیو چین بارے سارے سرکاری اَتے نجی شعبے دے شراکت داراں کوں شرکت دی دعوت ݙتی ونڄے اَتے سفارشات تے مؤثر عملدرآمد کوں یقینی بݨاوݨ کیتے قابل عمل تجویزاں وی پیش کیتی ونڄن۔ کمیٹی 2025 کیتے کنڑک دے پیداواری تخمینہ جات، کیری فارورڈ سٹاک اَتے سال 26-2025 کیتے کنڑک دی قومی ضرورتاں دا وی جائزہ ڳِھدا اَتے آکھیا جو کنڑک دی آوݨ آلی کٹائی تئیں قومی طلب کوں پورا کرݨ کیتے کنڑک دا وافر ذخیرہ موجود رہوے۔اجلاس اچ وزارت قومی غذائی تحفظ تے تحقیق، خزانہ اَتے منصوبہ بندی دے وزراء، وزیراعظم دے معاون خصوصی طارق باجوہ سودھے وزارت قومی غذائی تحفظ تے تحقیق، وزارت تجارت اَتے ایف بی آر دے اعلیٰ حکام وی شرکت کیتی۔
