پاکستان اَتے ترکیہ دا دفاع، تجارت، توانائی، ثقافت، تعلیم اَتے بنیادی ڈھانچے سودھا اہم شعبیاں اچ تعاون ٻیا تکڑا کرݨ اے باہمی تجارتی حجم 5 ارب ݙالر تئیں ودھاوݨ دا عزم، نائب وزیراعظم اسحاق ݙار دی ترک ہم منصب دے کٹھے پریس کانفرنس

APP32-090725 ISLAMABAD: July 09 - Deputy Prime Minister and Foreign Minister, Senator Mohammad Ishaq Dar receives the Turkish Minister of National Defence, Yasar Guler at Ministry of Foreign Affairs. APP/MAF/TZD

اسلام آباد۔ 9 جولائی(اے پی پی)پاکستان اَتے ترکیہ دفاع، تجارت، توانائی، ثقافت، تعلیم اَتے بنیادی ڈھانچے سودھا اہم شعبیاں اچ ݙو طرفہ تعاون ٻیا ودھاوݨ اَتے ݙو طرفہ تجارتی حجم کوں 5 ارب ݙالر تئیں ڳھن ونڄݨ دا عزم دوہریندے آکھیے جو پاکستان اَتے ترکیہ کئی علاقائی اَتے عالمی معاملات تے ہکو ڄھیاں موقف رکھدن، اعلیٰ سطح وفود دے باہمی تبادلے ݙوہیں ملکاں دے مستحکم تعلقات دے عکاس ہن۔ اے ڳالھیں نائب وزیراعظم اَتے وزیر خارجہ اسحاق ݙار اَتے ترک وزیر خارجہ حاقان فیدان مشترکہ پریس کانفرنس اچ اکھین۔ انہاں اعلیٰ سطح اسٹریٹجک تعاون کونسل دے تحت قائم کیتی ڳئی 12 مشترکہ قائمہ کمیٹیاں دی جاری پیشرفت تے اطمینان کیتا۔ نائب وزیراعظم اسحاق ݙار دورہ پاکستان تے آئے ہوئے ترکیہ دے وزیر خارجہ حاقان فیدان اَتے وزیر دفاع یاشار گلر دا خیر مقدم کریندے آکھیا جو پاکستان اَتے ترکیہ دے اعلیٰ سطح دے وفود دے باہمی تبادلے ݙوہیں ملکاں دے مستحکم برادرانہ تعلقات دی عکاسی کریندن۔ انہاں آکھیا جو پاکستان اَتے ترکیہ دے باہمی تعلقات ٻہوں تکڑے ہین، مختلف ݙو طرفہ اَتے علاقائی امور دے حوالے نال اساں ہک ݙوجھے نال قریبی رابطے اچ رہندے ہیں، تیزی نال بدلدے عالمی حالات سانڳے پہلے دے مقابلے اچ ہݨ اینڄھے رابطے وݙے ضروری ہین، پاکستان ترکیہ دے تجربات توں فائدہ چاوݨ چاہندے ہیں، اساں خطے اچ امن و سلامتی کیتے ترکیہ نال اپݨے تعلقات کوں ٻیا ودھاوݨ چاہندے ہیں۔ سینیٹر محمد اسحاق ݙار آکھیا جو اڄ اساں جوائنٹ کمیشن دے پہلے اجلاس اچ مشترکہ طور تے انہاں سٹینڈنگ کمیٹیاں دی کارکردگی تے تفصیلی غور کیتے، کڄھ کمیٹیاں دے اجلاس پہلے ہی تھی چکین یا کڄھ ݙینھ اچ تھی ویسن، سکیورٹی، انٹیلی جنس اَتے دفاع دے حوالے نال حالیہ قائم کیتی ڳئی کمیٹی دا اجلاس 24 جولائی کوں اسلام آباد اچ تھیسی جݙاں جو تجارت و سرمایہ کاری دی کمیٹی دا اجلاس 2 جون کوں تھئے، دفاعی پیداوار دی صنعت دے حوالے نال قائم کمیٹی دا اجلاس ستمبر دے اواخر اچ تھیسی، کمیٹی برائے ٹرانسپورٹ و کمیونیکیشن دا اجلاس آوݨ والے ہفتے متوقع اے، اِیویں ٻیاں کمیٹیاں بشمول صحت، سائنس و ٹیکنالوجی، سوشل سیکٹر ݙیولپمنٹ، کلچر اینڈ ٹورازم، ایگریکلچر اینڈ واٹر، انرجی اینڈ پاور، بینکنگ اینڈ فنانس اَتے سیاسی و سفارتی کوآرڈینیشن کمیٹیاں دے اجلاس وی آوݨ والے مہینیاں اچ تھیسن۔ انہاں آکھیا جو فریقین انہاں ݙوہیں حالیہ ملاقاتاں دے کیتے ڳئے فیصلیاں تے عملدرآمد دی رفتار تے مطمئن ہین، اساں کراچی اچ ترکیہ دے کاروباری و صنعتی اداریاں کیتے مخصوص ہک مشترکہ خصوصی اقتصادی زون دے قیام دا وی جائزہ گھِندے پئے ہیں، استنبول، تہران اَتے اسلام آباد ٹرین بحال تھی چُکی ہے اَتے ایں حوالے نال وفود دی سطح تے ایندے روٹس دا تعین کیتا ویسی۔ انہاں آکھیا جو ترکیہ دیاں کمپنیاں پاکستان وچ دانش یونیورسٹی میگا پراجیکٹ دے تحت جناح میڈیکل کمپلیکس دے قیام دا جائزہ وی گھِندیاں پئن، ایویں ہی ترک کمپنیاں پاکستان اچ آف شور ݙرلنگ پراجیکٹس اچ وی شامل ہوسن اَتے ایں سانڳے وݙی دلچسپی ݙکھائی اے، ترک کمپنیاں پاور سیکٹر اچ بجلی دی تقسیم کار کمپنیاں (ݙسکوز) دی نجکاری اچ دلچسپی رکھدن۔ نائب وزیراعظم آکھیا جو پاکستان اَتے ترکیہ انسداد دہشت گردی دے مقابلے کیتے استعداد کار ودھاوݨ کیتے وی مؤثر شراکت داری کوں یقینی بݨینداں پین، اساں شپ بریکنگ، کولڈ سٹوریج اَتے میونسپل اینڈ ایگریکلچر واٹر دے بہتر استعمال کیتے وی ترکیہ دے تجربات توں فائدہ چاوݨ چاہندے ہیں۔ گزریل 11 سال توں غیر فعال جوائنٹ منسٹرل کمیشن کوں فعال کرݨ تے وی اتفاق کیتا ڳئے، اے سارے اقدامات آوݨ والے سال ترکیہ اچ وزیراعظم محمد شہباز شریف اَتے ترکیہ دے صدر دی مشترکہ صدارت اچ تھیوݨ والے اَٹھویں ہائی لیول سٹرٹیجک کوآپریشن کونسل دے اجلاس کوں کامیاب بݨاوݨ کیتے مستحکم بنیاداں ݙیسن۔ ایں موقع تے ترکیہ دے وزیر خارجہ حاقان فیدان سینیٹر اسحاق ݙار دی گالھ مہاٹ تے تشکر کریندے ہوئیں آکھیا جو ساݙا اے دورہ ٻہوں کامیاب رہے، اساں وفود دی سطح تے ملاقات کیتی اے اَتے بعد اچ وزیراعظم محمد شہباز شریف نال وی ملݨے اتے فیلڈ مارشل سید عاصم منیر نال وی اساݙی ملاقات تھیسی، ترکیہ اَتے پاکستان دے اقوام دے تعلقات مستقبل اچ ٻئے چنڳے نتائج ݙیسن۔ انہاں آکھیا جو ترک صدر دی ہدایت تے ترکیہ دے سارے ادارے ایں فریم ورک دے تحت اعلیٰ سطح سٹرٹیجک کونسل دے فیصلیاں تے عملدرآمد کیتے جامع اقدامات کریندے پئن، باہمی تجارت کوں 5 ارب ݙالر تئیں وسعت ݙیوݨ کیتے پرعزم ہیں، مختلف معاشی شعبیاں اچ ݙو طرفہ شراکت داری ودھاوݨ دے امکانات دا جائزہ گھِندے پئے ہیں۔ پاکستان اَتے ترکیہ دیاں نیشنل آئل کمپنیاں ہک معاہدے تے دستخط کیتن جیندے دے تحت اساݙیاں کمپنیاں مشترکہ طور تے پاکستان اچ تیل و قدرتی گیس دے ذخائر ڳولݨ کیتے آف شور ݙرلنگ دے منصوبیاں اچ کم کریسن، اے معاہدہ اساݙے ڈھانچہ جاتی تعاون دی تازہ ترین مثال اے، انسداد دہشت گردی کیتے باہمی تعاون جاری رکھیسوں۔