اسلام آباد۔ 9 جولائی(اے پی پی)وزیراعظم محمد شہباز شریف پاک-ترکیہ ݙو طرفہ تعلقات اچ مثبت پیشرفت تے اطمینان کریندے تجارت، سرمایہ کاری، ٹیکنالوجی اَتے دفاع سودھا مختلف شعبیاں اچ ترکیہ نال تعاون ٻیا تکڑا بݨاوݨ اَتے سٹریٹیجک شراکت داری اچ وٹاوݨ دا پاکستان دے پختہ عزم دوہرائے۔ وزیراعظم محمد شہباز شریف نال ترکیہ دے وزیر خارجہ ہاکان فیدان اَتے قومی دفاع دے وزیر یاسر گلر ملین۔ ملاقات اچ نائب وزیراعظم اَتے وزیر خارجہ سینیٹر محمد اسحاق ݙار، چیف آف آرمی سٹاف فیلڈ مارشل سید عاصم منیر، وزیر دفاع خواجہ محمد آصف، قومی سلامتی دے مشیر لیفٹیننٹ جنرل محمد عاصم ملک اَتے ݙوجھے اعلیٰ حکام وی موجود ہن۔ ترک وفد دا خیر مقدم کریندے وزیراعظم پاکستان اَتے ترکیہ وچال دیرینہ برادرانہ تعلقات دا ݙسایا ڄیڑھا مشترکہ تاریخ، ثقافت اَتے باہمی احترام آلے ہین۔ انہاں ݙو طرفہ تعلقات دی مثبت پیشرفت تے اطمینان کیتا اَتے تجارت، سرمایہ کاری، ٹیکنالوجی اَتے دفاع سودھا مختلف شعبیاں اچ ترکیہ نال تعاون ٻیا تکڑا بݨاوݨ کیتے پاکستان دے غیر متزلزل عزم دا اعادہ کیتا۔ ایں سال ترکیہ دے صدر رجب طیب ایردوان نال تھیوݨ آلیاں اپݨیاں مختلف ملاقاتاں بشمول 17ویں ای سی او سربراہی اجلاس اچ حالیہ ملاقات دا ݙسیندے وزیراعظم پاک-ترکیہ تعلقات کوں سٹریٹیجک شراکت داری اچ وٹاوݨ دا پاکستان دا پختہ عزم دوہرایا۔ نائب وزیراعظم و وزیر خارجہ سینیٹر محمد اسحاق ݙار اَتے وزیر خارجہ ہاکان فیدان دی مشترکہ صدارت اچ مشترکہ کمیشن دے اجلاس دا خیر مقدم کریندے وزیراعظم امید کیتی جو ݙوہیں ملکاں وچال ݙو طرفہ تعلقات ٻئے چنڳے تھیسن جیندے نال کثیر جہتی شعبیاں اچ تعاون ودھسی اتے ݙوہیں ملک ہک ݙوجھے دے بنیادی مفادات کیتے اپݨی مضبوط اَتے غیر متزلزل حمایت جاری رکھیسن، وزیراعظم تیزی نال بدلدے علاقائی اَتے عالمی ماحول خاص کر غزہ اَتے ایران دے تناظر اچ ݙوہیں فریقاں وچال قریبی رابطیاں دی لوڑ تے زور ݙیتا۔ انہاں ہک واری ول بھارت نال حالیہ تنازعے اچ پاکستان دی مستقل حمایت تے ترک قوم اَتے قیادت دا شکریہ ادا کیتا۔ وزیراعظم 5 ارب ݙالرز دے باہمی متفقہ ہدف سانڳے ݙو طرفہ تجارت کوں ودھاوݨ دی ݙوہیں ملکاں ولوں ٹھوس کوششاں دی لوڑھ تے زور ݙیتا۔ انہاں ترک کمپنیاں کوں پاکستان اچ اپݨی سرمایہ کاری دا دائرہ ودھاوݨ دی دعوت ݙتی اَتے ترکیہ کوں پاکستان دی ساختی اصلاحات اَتے اقتصادی ترقی وچ اشتراک دی دعوت ݙتی۔
