راولپنڈی۔ 9 جولائی(اے پی پی)آئی ایس پی آر موجب پاک فضائیہ دے سربراہ ائیر چیف مارشل ظہیر احمد بابر سدھو نال جمہوریہ ترکیہ دے وزیر دفاع یاسر گلر دی قیادت اچ ہک اعلیٰ سطح وفد ائیر ہیڈ کوارٹرز اسلام آباد دے دورے ویلھے ملیے۔ انہاں علاقائی سلامتی دی صورتحال، جاری دفاعی تعاون دی پیشرفت اَتے جنگ دے اُبھردے شعبیاں اچ مستقبل اچ تعاون دے امکانات تے الایا ڳیا۔ ملاقات اچ پاک فضائیہ دے سربراہ پاکستان اَتے ترکیہ وچال پائیدار برادرانہ تعلقات کوں اڳونہا کریندے ہوئیں مشترکہ امنگاں اَتے تزویراتی ہم آہنگی تے زور ݙیتا جیڑھے ݙوہیں ملکاں کوں جڑیندن۔ انہاں جدید تربیت اَتے ایرو سپیس ٹیکنالوجیز دے شعبیاں اچ ݙو طرفہ تعاون ٻیا تکڑا بݨاوݨ دے پی اے ایف دے پختہ عزم دا اعادہ کیتا۔ انہاں باہمی دلچسپی دے مختلف شعبیاں اچ پیشرفت کوں ہموار اَتے تیکھا کرݨ کیتے وقف مشترکہ ورکنگ گروپس دے قیام تے وی اتفاق کیتا۔ ترک وزیر دفاع پاک فضائیہ ولوں پرتپاک استقبال اَتے شاندار مہمان نوازی تے ائیر چیف دا شکریہ ادا کیتا۔ انہاں بھارت نال حالیہ تنازعے اچ ایئر چیف دی بصیرت مند قیادت اچ پی اے ایف دی غیر معمولی کارکردگی دی تعریف کریندے آپریشنل تیاریاں اَتے قومی خودمختاری دے پرعزم دفاع کوں سراہیا۔ ترکیہ اَتے پاکستان وچال دیرینہ برادرانہ تعلقات کوں اجاگر کریندے ہوئیں انہاں صنعت دی سطح تے ودھ تعاون نال ݙو طرفہ دفاعی تعلقات کوں تقویت ݙیوݨ دی ترکیہ دی پرعزم خواہش دا ݙسایا۔ انہاں خاص کر جدید ترین شعبیاں بشمول رکاوٹان پاوݨ آلیاں ٹیکنالوجیز، جدید ایویونکس اَتے بغیر پائلٹ دے فضائی نظام اچ مشترکہ منصوبے ڳولݨ تے زور ݙیتا۔ ترک وزیر دفاع پائلٹ ایکسچینج پروگرام اچ پی اے ایف دی مسلسل حمایت دی وی تعریف کیتی جیکوں انہاں ݙوہیں فضائی افواج وچال پیشہ ورانہ ترقی اَتے آپریشنل مفاہمت ودھاوݨ سانڳے ہک اہم اقدام قرار ݙیتا۔ انہاں بہتر تربیتی تعاون دے طریقیاں کوں حتمی شکل ݙیوݨ تے اتفاق کیتا اَتے مشترکہ ݙو طرفہ اَتے کثیر جہتی فضائی مشقاں دے پیمانے اَتے دائرہ کار کوں ودھاوݨ کیتے اپݨے مضبوط عزم دا اعادہ کیتا۔
