بیجنگ۔ 9 جولائی (اے پی پی) وفاقی وزیر اطلاعات عطاء اللہ تارڑ عالمی تہذیباں دے مکالمے بارے وزارتی اجلاس کیتے بیجنگ پڄ ڳئن۔ اے اجلاس 10 اَتے 11 جولائی کوں چین دی کمیونسٹ پارٹی دی مرکزی کمیٹی دے پبلسٹی اَتے انٹرنیشنل ݙیپارٹمنٹس اَتے چین دی وزارت خارجہ دے اشتراک نال تھیوݨے۔ عالمی تہذیباں دا مکالمہ چینی صدر شی جن پنگ دے وژن بارے عالمی تہذیباں دے اقدام دا حصہ اے۔ وفاقی وزیر اطلاعات عطاء اللہ تارڑ “سولائزیشن اینگیجمنٹ اینڈ میوچل لرننگ – ثقافتی وراثت اَتے جدت” دے موضوع تے ذیلی فورم اچ خطاب کریسن۔ وفاقی وزیر اطلاعات دی مکالمے اچ شرکت ثقافت، میڈیا اَتے جدت دے شعبیاں اچ مختلف تہذیباں وچال مکالمے اَتے تعاون کوں ودھاوݨ دی اہمیت دا عکاس اے۔ اپݨے دورے اچ وفاقی وزیر اطلاعات دی سی پی سی سنٹرل کمیشن دے پبلسٹی ݙیپارٹمنٹ دی ݙپٹی ہیڈ، نیشنل ریڈیو اینڈ ٹی ویژن ایڈمنسٹریشن چائنا دی پارٹی سیکرٹری اَتے وزیر کاؤ شو من نال ملاقات وی تھیسی جیندے اچ پاکستان اَتے چین وچال میڈیا تعاون ٻیا تکڑا کرݨ تے الایا ویسی۔ ثقافتی تبادلے و باہمی افہام و تفہیم دے نویں مواقع ڳولݨ تے وی ڳالھ مہاڑ کیتی ویسی۔ وفاقی وزیر اطلاعات دی اعلیٰ سطح تقریب اچ شرکت چین اَتے پاکستان دی قیادت اَتے اوںدے عوام وچال مضبوط رشتے اَتے ݙوہیں ملکاں دی تہذیبی مکالمے کوں فروغ ݙیوݨ دی مشترکہ سوچ دی عکاس اے۔ ایں موقع تے وفاقی وزیر اطلاعات آکھیا جو تہذیباں وچال مکالمہ ہی عالمی ہم آہنگی، امن اَتے ترقی دی بنیاد اے، پاکستان ایں سانڳے اپݨا فعال کردار ادا کریندا رہسی، پاکستان اَتے چین وچال میڈیا اَتے ثقافتی تعاون ݙوہیں ملکاں دے عوام کوں نیڑے گھن آوݨ دا ذریعہ بݨدا پئے۔ وفاقی وزیر آکھیا جو اے اجلاس ڄڳ دیاں تہذیباں وچال باہمی احترام اَتے سکھݨ دے جذبے کوں فروغ ݙیوݨ دا نویکلا موقع اے۔
