معروف صحافی زبیدہ مصطفی دے انتقال تے اکادمی ادبیات پاکستان دا اظہار تعزیت

اسلام آباد۔ 10 جولائی (اے پی پی سرائیکی نیوز سروس) اکادمی ادبیات پاکستان دی صدر نشین ڈاکٹر نجیبہ عارف اَتے ناظم اعلیٰ جناب سلطان ناصر ملک دی معروف صحافی زبیدہ مصطفی دے انتقال تے ݙکھ تے افسوس کیتا۔زبیدہ مصطفی 9 جولائی 2025 کوں 84 سال دی عمر اچ انتقال کر ڳئی ہن۔ او صحافی، کالم نگار، ایڈیٹر اَتے انسانی حقوق دی علمبردار ہن۔ انہاں جامعہ کراچی توں تعلیم حاصل کیتی اَتے بعد اچ بیرون ملک توں وی تعلیم دا سلسلہ جاری رکھیا۔ او ہمیشہ تریمتاں دے حقوق دی پرزور حمایتی رہی۔ 1975 اچ انہاں روزنامہ دان اچ ایڈیٹوریل رائٹر دے طور تے شمولیت اختیار کیتی۔ زبیدہ مصطفی دی تحریراں اڄ وی یونیورسٹیاں، تحقیقی اداریاں اَتے سماجی تنظیماں اچ بطور حوالہ پیش کیتی ویندن۔ او پاکستان دی پہلی تریمت صحافی ہن جنہاں کوں مئی 2012 اچ انٹرنیشنل ویمن میڈیا فاؤنڈیشن لائف ٹائم اچیومنٹ ایوارڈ ݙتا ڳیا۔ صدر نشین اکادمی ڈاکٹر نجیبہ عارف اَتے ناظم اعلیٰ جناب سلطان ناصر مرحومہ زبیدہ مصطفی دی مغفرت اَتے انہاں دے پسماندگان کیتے صبر جمیل دی دعا کیتی۔

ڈاکٹر سعدیہ کمال