دھریجہ نگر دی قدیمی جامع مسیت اچ سرائیکی ترجمہ آلے قرآن شریف دی گُھنڈ کھلائی دی تقریب

خان پور(اے پی پی) دھریجہ نگر دی قدیمی جامع مسیت اچ سرائیکی ترجمہ آلے قرآن شریف دی گُھنڈ کھلائی دی تقریب منعقد کیتی ڳئی جئیں دی سانجھی صدارت سئیں ظہوراحمد دھریجہ تے امام مسیت حافظ محمد طاہر دھریجہ کیتی۔ واضح رہے جو سرائیکی دے سوکھے ترجمہ آلے قرآن شریف دے چھاپݨ دا اہتمام جھوک پبلشرز ملتان ظہور دھریجہ دی خاص نگرانی اچ کیتے۔ اے ترجمہ معروف سرائیکی لکھاری دلشاد کلانچی کیتا ہئی۔ جئیں کوں نویں سروں جھوک پپلشرز چھاپیے۔ ایں موقع تے سرائیکی ترجمہ آلے قرآن پاک دے نسخے شرکاء اچ ونڈیے ڳئن۔ ایں موقع تے خطاب کریندے سرائیکستان قومی کونسل دے چیئرمین ظہور دھریجہ آکھیا جو سرائیکی ترجمہ آلے قرآن پاک نال وسیب دے لوکاں کوں اللہ دا فرمان آپݨی مادری زبان سرائیکی اچ سمجھݨ پڑھݨ اچ سوکھ تھیسے، انہاں آکھیا جو اے ٻہوں نایاب تھی ڳیا ہئی ریاست بہاولپور دے دور اچ اے چھپیا ہئی جئیں دے نسخے ٻہوں نایاب تھی ڳئے ہن تے اساں ایں کوں نویں سروں ڈیزائن کرتے چھاپیے۔

ایں موقع تے پروفیسرنذیراحمد بذمی کمپیئرنگ دے فرائض انجام ݙتے۔ خورشید احمد دھریجہ، ضلعی صدر سرائیکستان قومی کونسل مقصود احمد دھریجہ، خان محمد دھریجہ، سرائیکی رہنما حاجی عید احمد دھریجہ، محمد حنیف دھریجہ، قدیر احمد دھریجہ، سرائیکی رہنما آصف دھریجہ، ذیشان دھریجہ،مؤذن عدنان دھریجہ،محمد سلیم دھریجہ، غلام یسین سانول دھریجہ،محمد رمضان دھریجہ، اللہ جوایا گورڑا جمالی،سرائیکی رہنما ارشد رحمانی ، ہوشو شیدی، سٹی صدرخان پور سرائیکستان قومی کونسل فیاض خان پتافی سودھے علاقے دے لوکاں وݙی تعداد اچ  تقریب اچ شرکت کیتی۔