پی ڈی ایم اے دا دریائے جہلم، چناب، راوی اتے ستلج اچ فلڈ الرٹ جاری، متعلقہ اداریاں کوں الرٹ رہݨ دی ہدایت

لاہور (اے پی پی) پی ڈی ایم اے پنجاب دے دریاواں اچ آندے 24 گھنٹیاں اچ سیلاب دا خدشہ ظاہر کریندیں ہوئیں متعلقہ اداریاں کوں الرٹ رہݨ دی ہدایت کر ݙتی اے۔ ترجمان پی ڈی ایم اے موجب 21 توں 23 جولائی اچ دریائے جہلم، چناب اتے راوی اچ بارشاں پاروں درمیانے توں اُچے درجے دے سیلاب جݙاں جو کل 22 توں 24 جولائی وچال دریائے ستلج گنڈا سنگھ والا دی ڄاہ تے وی پاݨی دے بہاء اچ ودھارے دا خدشہ اے، جئیں دے حوالے نال الرٹ جاری کر ݙتا ڳئے، مون سون بارشاں دا چوتھا سپیل 25 جولائی تئیں جاری رہݨ دا امکان اے.کمشنر لاہور، راولپنڈی، گوجرانوالہ، سرگودھا، فیصل آباد، ملتان، ڈیرہ غازی خان، ساہیوال اتے بہاولپور ڈویژن جݙاں جو گجرات، منڈی بہاؤالدین، سرگودھا، خوشاب، جھنگ، ننکانہ صاحب، فیصل آباد، اوکاڑہ اتے ٹوبہ ٹیک سنگھ سودھے ٻئے ضلعیاں دے ڈپٹی کمشنرز کوں وی الرٹ جاری کر ݙتا ڳئے۔ ریسکیو 1122 کوں سارے انتظامات پیشگی مکمل کرݨ دی ہدایت کیتی ڳئی اے جݙاں جو لوکل گورنمنٹ، محکمہ زراعت، محکمہ آبپاشی، محکمہ صحت، محکمہ جنگلات، لائیو سٹاک اتے محکمہ ٹرانسپورٹ کوں وی الرٹ جاری کر ݙتا ڳئے۔ڈی جی پی ڈی ایم اے عرفان کاٹھیا متعلقہ انتظامیہ کوں آکھیا جو وزیر اعلیٰ پنجاب دی ہدایت تے سارے انتظامات پیشگی مکمل کرن۔ ایمرجنسی کنٹرول رومز اچ سٹاف کوں الرٹ رکھیا ونجے. ریسکیو 1122 دی ڈائزاسٹر رسپانس ٹیماں کوں وی ہائی الرٹ رکھیا ونجے. ڈی جی پی ڈی ایم اے آکھیا جو ریسکیو آپریشن کیتے پٹرول تے ڈیزل دا اسٹاک وافر مقدار اچ ہووݨا چاہیدے، عوام کوں اڄوکی صورتحال توں ہر لمحہ آگاہ رکھیا ونجے. دریاواں دے پاٹ اچ موجود مکاناں اتے مویشیاں دے انخلا کوں یقینی بݨایا ونجے. فلڈ ریلیف کیمپس اچ خوراک، پیوݨ دے صاف پاݨی تے ٻئی سہولتاں دی فراہمی کوں یقینی بݨایا ونجے. انہاں آکھیا جو عوام جاری تھئی احتیاطی تدابیر تے عمل کرن اتے ہنگامی انخلا دی صورت اچ انتظامیہ نال تعاون کرن۔ انہاں ٻیا آکھیا جو حکومت پنجاب تہاݙا اتے تہاݙے مال مویشیاں دا پوری طرح نال خیال رکھسی۔ شہری ایمرجنسی دی صورت اچ پی ڈی ایم اے دی ہیلپ لائن 1129 تے رابطہ کرن۔