غزہ اچ ہر پنڄواں ٻال غذائی قلت دا شکار، مصر اچ خوراک اتے دوائیں دے 6 ہزار ٹرکاں کوں متاثرہ علاقیاں تئیں پُڄݨ دی اجازت نئیں ݙتی ویندی پئی، اقوام متحدہ

غزہ۔25جولائی (اے پی پی) اقوام متحدہ دے ادارہ برائے فلسطینی مہاجرین (یو این آر ڈبلیو اے) دے سربراہ فلپ لزارینی خبردار کیتے جو غزہ شہر اچ ہر پنڄواں ٻال شدید غذائی قلت دا شکار اے اتے ہر لنگھدے ݙینھ دے نال صورتحال ٻئی تشویشناک تھیندی پئی اے۔ سی جی ٹی این دی رپورٹ موجب یو این آر ڈبلیو اے دے کمشنر جنرل فلپ لزارینی آکھیا جو غزہ اچ اساݙی ٹیماں کوں جیڑھے ٻال مِلدے پئن، او ٻہوں کمزور، لاغر اتے جان لیوا غذائی قلت دا شکار ہن اتے فوری طبی امداد نہ مِلݨ دی صورت اچ انہاں دی زندگیاں خطرے اچ ہن۔ انہاں انکشاف کیتا جو ہݨ تئیں 100 توں ودھ لوک، جنہاں اچ ودھ ٻال شامل ہن، بکھ پاروں جان دی بازی ہار ڳئن۔فلپ لزارینی آکھیا جو ٻال تاں بکھ نال نڈھال ہن ای، لیکن والدین وی اتنے بکھے ہن جو او ٻالاں دی ݙیکھ بھال دے قابل نئیں رہیے۔ جیڑھے چند خاندان یو این آر ڈبلیو اے دے کلینکس تئیں پُڄدن، انہاں دے جسم اچ نہ تاں توانائی ہوندی اے، نہ خوراک، نہ ہی او وسائل جو او آپݨاں اتے ٻالاں دا علاج جاری رکھ سڳݨ۔ انہاں آکھیا جو غزہ اچ اساݙا طبی عملہ روزانہ صرف ہک معمولی کھاݨے تے گزارا کریندا پئے، اکثر اوقات صرف دال تے اتے بعض اوقات تاں انہاں کوں کجھ وی میسر نئیں ہوندا، جئیں دی وجہ توں عملے دے بندے ݙیوٹی وچال بکھ نال لاغر اتے بے ہوش تھیوݨ لڳ پئن۔ فلپ لزارینی آکھیا جو جے نگہداشت کرݨ آلے خود بکھے ہوون تاں پوری امدادی مشینری مفلوج تھی ویندی اے۔ فلپ لزارینی عالمی برادری توں انسانی ہمدردی دی بنیاد تے امداد بلا تعطل اتے بلا رکاوٹ غزہ پُڄاوݨ دی اپیل کیتی۔ انہاں آکھیا جو اساݙے کول اردن اتے مصر اچ تقریباً 6,000 ٹرک خوراک تے دوائیں نال لݙیے تیار کھڑن لیکن انہاں کوں متاثرہ علاقیاں تئیں پُڄݨ دی اجازت نئیں ݙیتی ویندی پئی۔