پاک امریکہ تجارتی معاہدہ دا مقصد ݙو پاسہ تجارت دا فروغ، سرمایہ کاری کوں راغب کرݨ اتے تجارتی تعاون کوں ودھاوݨ اے، وزارت خزانہ

اسلام آباد۔31جولائی (اے پی پی) پاکستان اتے امریکہ وچال تجارتی معاہدہ دا مقصد ݙو پاسہ تجارت دا فروغ، ہک ݙوجھے دی منڈیاں تئیں رسائی کوں ودھاوݨ، سرمایہ کاری کوں راغب کرݨ اتے آپسی دلچسپی دے شعبیاں اچ تعاون کوں فروغ ݙیوݨ اے۔ وزارت خزانہ توں جاری بیان موجب ایں ڳالھ وزیر خزانہ سینیٹر محمد اورنگزیب دی امریکی سیکرٹری کامرس (وزیر تجارت) ہاورڈ لوٹنک اتے امریکی تجارتی نمائندے (یو ایس ٹی آر) جیمیسن گریر نال ملاقات اچ کیتی۔ ایں ملاقات دے بعد پاکستان اتے امریکہ وچلا تجارتی معاہدہ طے تھیوݨ دا اعلان امریکی صدر ڈونلڈ ٹرمپ سوشل میڈیا تے آپݨی پوسٹ اچ کیتا۔ وزارت خزانہ موجب ملاقات اچ سیکرٹری کامرس جواد پال اتے امریکہ اچ پاکستان دے سفیر رضوان سعید شیخ وی موجود ہن۔ ایں معاہدے دے نتیجے اچ آپسی ٹیرف خاص طور تے امریکہ اچ پاکستانی مصنوعات تے لڳݨ آلے ٹیرف ڳھٹ تھیسی، اے معاہدہ ݙوہیں ملکاں وچال اہم اقتصادی شعبیاں خاص طور تے توانائی، معدنیات، آئی ٹی، کرپٹو کرنسی اتے ݙوجھے شعبیاں اچ اقتصادی تعاون دے ہک نویں دور دے آغاز دا باعث بݨسی۔ اے معاہدہ ریاست ہائے متحدہ دے نال پاکستان دے تجارتی تعلقات کوں ودھاوݨ خصوصاً انہاں تعلقات کوں امریکی ریاستاں تئیں ودھاوݨ بارے جاری کوششاں اچ معاون ثابت تھیسی۔ ایں دے تحت ݙوہیں ملکاں کوں ہک ݙوجھے دی منݙیاں تئیں بہتر رسائی میسر آسی۔ ایں معاہدے نال پاکستان دے بنیادی ڈھانچے اتے ترقیاتی منصوبیاں اچ امریکی سرمایہ کاری اچ ودھارا متوقع اے۔ اے تجارتی معاہدہ ݙوہیں ملکاں دی قیادت آلے پاسے ݙو پاسہ تعلقات کوں ٻیا ودھاوݨ اتے تجارت اتے سرمایہ کاری روابط کوں مضبوط بݨاوݨ کیتے ساری کوششاں لاوݨ دے عزم دی نشاندہی کریندے۔