امریکی ٹیرف نافذالعمل تھی ڳئے، ڈیڈلائن توں پہلے امریکی بندرگاہواں آلے پاسے روانہ کیتا ڳیا سامان 5 اکتوبر تئیں پراݨے گھٹ محصولاں تے داخل تھی سڳسی

واشنگٹن۔7اگست (اے پی پی) امریکی صدر ڈونلڈ ٹرمپ ولوں تجارتی شراکت داراں تے لاتا ڳیا 10 فیصد توں 50 فیصد تئیں دا نواں ٹیرف خمیس کوں نافذالعمل تھی ڳئے ۔ یو ایس کسٹمز اینڈ بارڈر پروٹیکشن ایجنسی خمیس کوں رات 12 وڄے توں نویں ٹیرف دے حساب نال محصولات وصول کرݨ شروع کر ݙتے جڈانجو او سامان جو خمیس دی رات 12 وڄے دی ڈیڈلائن توں پہلے امریکی بندرگاہواں آلے پاسے روانہ کیتا ڳیا ہا، او 5 اکتوبر تئیں پراݨے گھٹ محصولاں تے داخل تھی سڳسی۔ رائٹرز دی رپورٹ موجب امریکی صدر ڈونلڈ ٹرمپ ولوں نویں ٹیرف دے نافذ تھیوݨ دے بعد انہاں دی ایں حکمت عملی دا عملی امتحان شروع تھی ڳئے جو کیا او امریکی تجارتی خسارے کوں عالمی سپلائی چین اچ شدید خلل، مہانگ اچ ودھارے اتے تجارتی شراکت داراں دی سخت جوابی کارروائی دے بغیر گھٹ کر سڳدن یا نئیں۔ رپورٹ موجب یو ایس کسٹمز اینڈ بارڈر پروٹیکشن ایجنسی خمیس کوں رات 12:01 وڄے (ای ڈی ٹی) توں اے بلند ٹیرف وصول کرݨ شروع کر ݙتے  جئیں توں پہلے کئی ہفتے تئیں ٹرمپ دی حتمی شرحاں اتے اہم تجارتی شراکت داراں دے نال مذاکرات دی غیر یقینی صورتحال جاری رہی۔ یو ایس سی بی پی ولوں جاری نوٹس موجب او سامان جو امریکی بندرگاہواں آلے پاسے روانہ کیتا ڳئے اتے ادھی رات دی ڈیڈلائن توں پہلے روانہ تھیا، او 5 اکتوبر تئیں پراݨے گھٹ محصولاں تے داخل تھی سڳسی۔ ایں توں پہلے، اپریل اچ بلند محصولاں دے اعلان دے باوجود، کئی ملکاں توں درآمدات تے صرف 10 فیصد بنیادی درآمدی ڈیوٹی لاتی ویندی پئی ہئی۔ بعد اچ ٹرمپ آپݨی محصولات دی پالیسی اچ کئی واری تبدیلی کریندیں ہوئیں کڄھ ملکاں تے بہوں ودھ شرحاں نافذ کر ݙتن، جنہاں اچ برازیل توں درآمدات تے 50 فیصد، سوئٹزرلینڈ تے 39 فیصد، کینیڈا تے 35 فیصد اتے بھارت توں آوݨ آلے سامان تے 25 فیصد تئیں دے محصولات شامل ہن۔ ڈونلڈ ٹرمپ بدھ کوں بھارت تے اںڄ توں 25 فیصد اضافی ٹیرف لاوݨ دا اعلان کیتا، جو 21 ݙینہ بعد نافذ تھیسی اتے ایں دی وجہ بھارت دی روسی تیل دی خریداری کوں قرار ݙتا ڳئے۔ ڈونلڈ ٹرمپ دعویٰ کیتا جو “انہاں محصولاں نال ارباں ڈالر امریکا آسن خصوصاً انہاں ملکاں توں جنہاں امریکا دا ناجائز فائدہ چاتا۔ سینٹر فار اسٹریٹجک اینڈ انٹرنیشنل اسٹڈیز واشنگٹن دے سینئر فیلو اتے تجارتی ماہر ویلیم رینش آکھیا جو “سپلائی چین اچ کجھ رد و بدل تھیسی، ہک نواں توازن قائم تھیسی، اتھ قیمتاں ودھسن لیکن ایں دا وݙا اثر ظاہر تھیوݨ اچ ویلھا لڳسی۔ انہاں مزید آکھیا جو “جنہاں ملکاں تے سخت ترین محصولات لاتے ڳئن، او صورتحال کوں درست کرݨ کیتے ٻھج دھرک کریندے رہسن۔ ٹرمپ دے حکم نامے اچ اے وی درج اے جو “ایجھا سارا سامان، جو کہیں تریجھے ملک دے ذریعے trans-ship تھی تے امریکا گھن آندا ڳیا ہووے تاں جو بلند محصولاں توں بچیا ونڄ سڳے، انہاں تے ٻیا 40 فیصد ودھیکی ڈیوٹی لاتی ویسی۔ جڈانجو انتظامیہ اے واضح نئیں کیتا جو ایجھے سامان دی نشاندہی اتے قانون نافذ کرݨ دا طریقہ کار کیا ہوسی۔