وزیراعظم شہباز شریف دی صدارت جائزہ اجلاس، گلگت بلتستان اچ 100 میگاواٹ دے سولر پاور منصوبے کوں ہک سال اچ پورا کرݨ دی ہدایت

اسلام آباد۔12اگست (اے پی پی) وزیراعظم محمد شہباز شریف گلگت بلتستان اچ 100 میگاواٹ دے سولر پاور منصوبے کوں ہک سال اچ پورا کرݨ دی ہدایت کریندیں ہوئیں آکھیا جو منصوبے دی خود نگرانی کریساں، ملک کوں موسمیاتی تبدیلی دے اثرات توں بچاوݨ کیتے ودھ توں ودھ قابل تجدید ذرائع کوں انرجی مکس اچ شامل کرݨا پوسی۔ منگل کوں وزیراعظم آفس دے میڈیا ونگ توں جاری بیان موجب انہاں اے ڳالھیں گلگت بلتستان اچ 100 میگاواٹ سولر منصوبے بارے جائزہ اجلاس دی صدارت کریندیں ہوئیں کیتی۔ اجلاس اچ وفاقی وزراء احسن اقبال، احد خان چیمہ، سردار اویس خان لغاری، وزیراعظم دے کوآرڈینیٹر مشرف زیدی، قابل تجدید توانائی شعبے دے ماہر ڈاکٹر جروین ڈریسمن اتے متعلقہ حکام شرکت کیتی۔ اجلاس کوں گلگت بلتستان اچ 100 میگاواٹ سولر منصوبے تے تھیوݨ آلی پیشرفت اتے لائحہ عمل دا ݙسیا ڳیا۔ وزیراعظم منصوبے دی تعمیر کیتے بݨائی ڳئی سٹیئرنگ کمیٹی دی سربراہی وفاقی وزیر ٻل بجلی سردار اویس احمد خان لغاری کوں ݙے ݙتی۔ اجلاس کوں ݙسایا ڳیا جو منصوبے دے تحت گلگت اچ 6، سکردو اچ 8 اتے دیامر اچ 6 سولر پارکس بݨائے ویسن۔ ایں طرح گلگت اچ 234، سکردو اچ 179 اتے دیامر اچ 68 عمارتاں تے سولر سسٹم دی تنصیب یقینی بݨائی ویسی۔ منصوبے اچ بیٹریز دی تنصیب نال بیک اپ کوں یقینی بݨاوݨ دے نال نال ایں دی ریئل ٹائم مانیٹرنگ دا وی نظام بݨایا ویندا پئے۔ اجلاس کوں ݙسایا ڳیا جو منصوبے اچ بین الاقوامی معیار کوں یقینی بݨایا ویسی۔ اجلاس کوں منصوبے دی تعمیری لاگت اتے خاص ویلھے بارے بریفنگ ݙتی ڳئی۔ وزیراعظم منصوبے کوں ہک سال اچ پورا کرݨ دی ہدایت کیتی۔ وزیراعظم آکھیا جو گلگت بلتستان اچ گھٹ لاگت ماحول دوست بجلی دی بلاتعطل فراہمی کیتے منصوبے کوں ترجیحی بنیاداں تے پورا کیتا ویسی، منصوبے دا سارا انفراسٹرکچر کلائیمیٹ ریزیلئینٹ بݨایا ونڄے۔ وزیراعظم آپݨے حالیہ اڄوکے گلگت دے دوران اے اعلان کیتا ہا جو گلگت بلتستان کیتے 100 میگاواٹ دے پاور پلانٹس دی ایکنک جلدی منظوری ݙیسی۔ وزیراعظم کوں ݙسایا ڳیا جو ایکنک ولوں حال اچ منظوری دے بعد منصوبے دی تعمیر تے کم دی رفتار کوں ٻیا تیز کر ݙتا ڳیا۔ وزیراعظم آکھیا جو منصوبے تے خرچ تھیوݨ آلی ساری لاگت وفاقی حکومت ݙیسی، گلگت توں اندھاریاں کوں دور کرݨ کیتے اے منصوبہ بہوں اہمیت دا حامل اے۔ وزیراعظم آکھیا جو گلگت بلتستان دے لوکاں کوں 18 توں 20 گھنٹے دی لوڈ شیڈنگ توں نجات اتے پرے دے علاقیاں اچ بجلی دی فراہمی کیتے سولرائیزیشن سب توں مناسب حل اے، منصوبہ گلگت بلتستان دے لوکاں کوں گھٹ لاگت اتے ماحول دوست بجلی ݙیسی۔ وزیراعظم آکھیا جو پاکستان کوں موسمیاتی تبدیلی دے اثرات توں بچاوݨ کیتے ودھ توں ودھ قابل تجدید ذرائع کوں انرجی مکس اچ شامل کرݨا پوسی۔ وزیراعظم ہدایت کیتی جو گلگت بلتستان اچ ہائیڈل اتے سولر ذرائع توں بجلی دی فراہمی کوں ایں طرح یقینی بݨایا ونڄے جئیں نال لوکاں کوں شدید موسم اچ بجلی دے تعطل توں نجات ملے۔ وزیراعظم آکھیا جو منصوبے دی تعمیر اچ شفافیت کوں یقینی بݨایا ونڄے۔