وفاقی وزیر قومی ورثہ و ثقافت اورنگزیب خان کھچی نال آذربائیجان دے سفیر خضر فرہادوف دی ملاقات

اسلام آباد۔12اگست (اے پی پی): وفاقی وزیر برائے نیشنل ہیریٹیج اینڈ کلچر ڈویژن اورنگزیب خان کھچی نال پاکستان اچ آذربائیجان دے سفیر خضر فرہادوف ملاقات کیتی۔ سفیر ݙوہاں ملکاں وچال ثقافتی تعاون ٻیا ودھاوݨ کیتے کئی تجویزاں پیش کیتن اتے 2024ء تا 2029ء دے ثقافتی تبادلہ پروگرام تے پورے عمل درآمد دی لوڑ تے زور ݙتا۔ سفیر آذربائیجان اچ 18 توں 28 ستمبر تئیں تھیوݨ آلے بین الاقوامی میوزک فیسٹیول دا وی ذکر کیتا جیڑھا معروف آذربائیجانی موسیقار عزیر حاجی بیوف دی یاد اچ ہوسی۔ سفیر آکھیا جو “پاکستان دے ریڈیو چینلز ایں فیسٹیول اچ آذربائیجانی موسیقی نشر کریسن اتے ثقافتی مراکز اچ ایں حوالے نال خصوصی تقریباں تھیسن جیندا مواد آذربائیجان ݙیسی۔ انہاں آذربائیجانی کلچرل ہیریٹیج اِن دی ورلڈ منصوبے اچ پاکستان دے تعاون دی وی درخواست کیتی جیندا مقصد آذربائیجان دے ثقافتی ورثے کوں عالمی سطح تے ودھاوا ݙیوݨ اتے ایںدی حفاظت کرݨ اے۔ وفاقی وزیر اورنگزیب خان کھچی پاکستان دے فنکاراں کوں ستمبر دے فیسٹیول اچ بھیجݨ اتے آذربائیجانی ثقافتی دستیاں کوں پاکستان اچ آپݨے فن، موسیقی اتے ورثے دی نمائش کیتے سݙݨ دا اعلان کیتا۔ انہاں اسلام آباد اچ “آذری کلچرل فیسٹیول” کرݨ اتے نمائشاں دے ذریعے آپسی افہام و تفہیم کوں ودھاوݨ دی تجویز ݙتی۔ ݙوہاں فریقاں ثقافتی تعاون ودھاوݨ، ورثہ و ثقافت نال متعلق موجودہ معاہدیاں دی نویں سروں منظوری اتے عوامی رابطیاں دے ودھارے تے اتفاق کیتا۔