وفاقی وزیر منصوبہ بندی احسن اقبال نال اے جے کے قانون ساز اسمبلی دے سپیکر دی قیادت اچ وفد دی ملاقات، ترقیاتی منصوبیاں اتے سیاحت دے ودھارے بارے گالھ مہاڑ

اسلام آباد۔13اگست (اے پی پی) وفاقی وزیر برائے منصوبہ بندی، ترقی، اصلاحات تے خصوصی اقدامات پروفیسر احسن اقبال نال آزاد جموں تے کشمیر قانون ساز اسمبلی دے وفد ملاقات کیتی جئیں دی قیادت سپیکر چوہدری لطیف اکبر کیتی۔ اے جے کے دے سابق وزیراعظم راجہ فاروق حیدر، وزیر مواصلات اتے ٻئے حکام وی ملاقات اچ شریک ہن۔ پلاننگ کمیشن دے مطابق ملاقات اچ آزاد جموں و کشمیر اچ جاری ترقیاتی منصوبیاں، بنیادی ڈھانچے دی تعمیر اتے سیاحت دے ودھارے بارے تفصیلی گالھ مہاڑ کیتی ڳئی۔ وزیر منصوبہ بندی پروفیسر احسن اقبال ایں موقع تے آکھیا جو کشمیر اچ ترقیاتی منصوبیاں دی جلدی تکمیل کیتے فنڈز جاری کیتے ویسن۔ انہاں آکھیا جو آزاد کشمیر دے سیاحتی مقامات پاکستان دی معیشت دی ترقی اچ نمایاں کردار ادا کریندے پئن، اے جے کے قانون ساز اسمبلی کمپلیکس دی تعمیر کیتے وزارت منصوبہ بندی دا پورا تعاون جاری رہسی۔ پروفیسر احسن اقبال آکھیا جو راتوہا ہریام پل دی تعمیر تیزی نال جاری اے جو جلدی پورا کر ڳھدا ویسی۔ نویں این ایف سی ایوارڈ اچ کشمیر، گلگت بلتستان اتے سابق فاٹا کیتے حصہ رکھیا ویسی۔ انہاں آکھیا جو پاکستان کوں دفاعی اتے سفارتی محاذ تے تاریخی کامیابی ملی اے، ہݨ لوڑھ ایں گالھ دی اے جو اساں قومی ترقی کیتے ٹیکس کلچر کوں ودھارا ݙیووں کیوں جو پاکستان اچ ٹیکس ݙیوݨ آلے لوکاں دا تناسب فکراں آلی حد تئیں گھٹ اے۔ انہاں دا آکھݨ ہا جو ترقیاتی بجٹ دی ہک ہک پائی شفاف اتے موثر طریقے نال خرچ کیتی ویندی پئی اے۔