فیلڈ مارشل سید عاصم منیر نال اول نائب وزیر دفاع اتے آذربائیجان دی فوج دے چیف آف جنرل سٹاف دی ملاقات، ݙوپاسہ تعلقات کوں ٻیا مستحکم کرݨ دا عزم

راولپنڈی۔13اگست (اے پی پی) چیف آف آرمی سٹاف فیلڈ مارشل سید عاصم منیر آذربائیجان دے نال پاکستان دے گہرے برادرانہ اتے ݙوپاسہ تعلقات کوں ٻیا مستحکم کرݨ دے عزم کیتے۔ ٻُدھ کوں آئی ایس پی آر توں جاری کیتے ڳئے بیان موجب چیف آف آرمی سٹاف فیلڈ مارشل سید عاصم منیر نال اول نائب وزیر دفاع اتے آذربائیجان دی فوج دے چیف آف جنرل سٹاف کرنل جنرل کریم ولیوف جنرل ہیڈ کوارٹرز (جی ایچ کیو) اچ ملاقات کیتی۔ ملاقات اچ آپسی دلچسپی دے معاملیاں تے گالھ مہاڑ کیتی ڳئی، خاص طور تے اڄوکی عالمی اتے علاقائی سلامتی دے منظرنامے تے توجہ ݙتی ڳئی۔ آرمی چیف آذربائیجان دے نال پاکستان دے برادرانہ تعلقات ، اتے ݙوپاسہ تعلقات کوں ٻیا مستحکم کرݨ دا عزم کیتا۔ انہاں آذربائیجان اتے آرمینیا دے درمیان کامیاب امن معاہدے تے معزز مہمان کوں وی مبارخ ݙتی۔ معزز مزمان معرکہ حق، آپریشن بنیان مرصوص اچ پاکستان دی مسلح افواج دی پیشہ ورانہ مہارت اتے کامیابیاں دی تعریف کیتی۔ وفد یوم آزادی اتے جشن فتح کیتے نیک خواہشات دا اظہار وی کیتا۔ فیلڈ مارشل معرکہ حق اچ پاکستانی عوام دے نال کھڑݨ اتے یوم آزادی دی تقریب اچ شرکت کیتے آذربائیجان دے دستے کوں بھیجݨ تے آذربائیجان دی قیادت اتے عوام دا شکریہ ادا کیتا۔ ݙوہیں عسکری رہنماواں دفاعی تعاون کوں اڳوں ودھاوݨ اتے علاقائی امن تے استحکام کیتے سانجھی کوششاں کوں ودھاوݨ دے سانجھے عزم دا اظہار کیتا۔ ایں موقع تے کرنل جنرل کریم ولیوف آذربائیجان دے صدر الہام علیوف ولوں فیلڈ مارشل عاصم منیر کوں پاکستان دے نال فوجی تعاون اچ خدمتاں دے اعتراف اچ آذربائیجان دا باوقار محب وطن جنگی تمغہ ݙتا۔ انہاں دہشت گردی دے خلاف جنگ اچ پاکستان دی پختہ کوششاں دی تعریف کیتی اتے دفاع اتے سلامتی اچ تعاون ودھاوݨ کیتے آذربائیجان دے عزم کیتا۔ معزز مہمان پاکستان دی گرمجوشی نال مہمان نوازی اتے آذربائیجان کیتے مستقل حمایت تے شکریہ ادا کیتا۔ ایں توں پہلے جی ایچ کیو آوݨ تے پاک فوج دے چاق و چوبند دستے کرنل جنرل کریم ولیوف کوں گارڈ آف آنر پیش کیتا۔ انہاں یادگار شہداء تے پھلاں دی چادر وی چاڑھی۔