پاکستان دے 78ویں یومِ آزادی تے پوری قوم دا سِر ماݨ نال اُچا اے، پاک فوج بھارت کوں بدترین شکست ݙتی، عالمی سطح تے پاکستان دی عزت ودھی، وفاقی وزیر عطا اللہ تارڑ

لاہور۔13اگست (اے پی پی) وفاقی وزیر اطلاعات و نشریات عطا اللہ تارڑ آکھیے جو “پاکستان دے 78ویں یومِ آزادی دے موقع تے پوری پاکستانی قوم دا سِر ماݨ نال اُچا رے ، پاک فوج اڄوکی جنگ اچ ازلی دشمن بھارت کوں بدترین شکست ݙتی، ایں شاندار کامیابی تے عالمی سطح تے پاکستان دی عزت اتے وقار اچ ودھارا تھئے، اے تاریخی فتح افواج پاکستان دے ناقابلِ شکست جذبے اتے پیشہ ورانہ صلاحیتاں دا منہ ٻولیندا ثبوت اے۔ انہاں اے ڳالھ ایوانِ قائداعظم جوہر ٹاؤن اچ یومِ آزادی اتے معرکہ حق دے سلسلے اچ منعقدہ ہک پُر وقار تقریب توں بذریعہ ویڈیو لنک خطاب کریندیں آکھی ۔ تقریب دا اہتمام ادارہ نظریہ پاکستان دے زیرِ اہتمام کیتا ڳیا ہئی، جیں اچ طالب علماں دے درمیان تقریری مقابلیں دے علاوہ انعاماں دی ونڈ دی ہک شاندار تقریب وی شامل ہئی۔ تقریب اچ ڈائریکٹرجنرل پریس انفارمیشن ڈیپارٹمنٹ شفقت عباس، پروفیسر عابد شیروانی، سیکرٹری ادارہ نظریہ پاکستان ناہید عمران گُل، ایڈیشنل سیکرٹری سیف اللہ چوہدری، معروف صحافی و تجزیہ کار عاصم نصیر، استاداں، طالب علماں اتے معاشرے دے مختلف طبقیں نال تعلق رکھݨ آلے معززین دی وݙی تعداد شرکت کیتی۔ وفاقی وزیر اطلاعات و نشریات عطا اللہ تارڑ آپݨے خطاب اچ آکھیا جو “یومِ آزادی دا اے ݙینھ ہر پاکستانی کیتے ہک وݙا موقع اے جو او آپݨی آزادی دی قدر کرے اتے ایں کوں مزید مضبوط بݨاوݨ کیتے آپݨا کردار ادا کرے۔” انہاں آکھیا جو “پاک فوج دشمن ولوں رات دے اندھارے اچ کیتے ڳئے بزدلانہ حملیں دا نہ صرف بھرپور مقابلہ کیتا بلکہ ایں کوں ایجھی سبق آموز شکست ݙتی جو دشمن بھارت کوں پچھوں ہٹݨ تے مجبور تھیوݨا پیا۔ انہاں آکھیا جو “سپہ سالار پاکستان فیلڈ مارشل جنرل عاصم منیر دی قیادت اچ پاک فوج فجر دی نماز دے بعد جوابی کاروائی شروع کیتی، جیں اچ دشمن کوں نک کنوں چݨے کھوائے اتے ایں کوں شکست دی ایجھی دلدل اچ سٹیا جو او آپݨی جاہ ہلݨ دے قابل وی نہ رہیا۔” “ایں کاروائی دشمن دے عزم کوں مٹی اچ ملا ݙتا اتے پاکستان دی عسکری طاقت کوں عالمی سطح تے ہک واری ول نمایاں مقام ݙیوایا۔” وفاقی وزیر پاک فوج دے سارے افسراں اتے جواناں کوں خراجِ تحسین پیش کریندیں آکھیا جو “انہاں دی بہادری، قربانیاں اتے پیشہ ورانہ مہارت اڄ پوری دنیا کوں پاکستان دی عسکری قوت اتے نظم و ضبط کوں منّݨ تے مجبور کرݙتے۔ انہاں آکھیا جو اے فتح صرف ہک عسکری کامیابی نئیں بلکہ پاکستانی قوم دی اتحاد، ایمان اتے نظم و ضبط دی عظیم مثال اے۔ایں فتح پاکستانی عوام کوں اے یقین ݙیوائے جو او کہیں وی اوکھے حالات اچ آپݨے وطن دی حفاظت اتے ترقی کیتے متحد تھی تے مقابلہ کر سڳدن۔عطا اللہ تارڑ ادارہ نظریہ پاکستان دی انتظامیہ کوں انہاں دی شاندار کوششاں تے خراجِ تحسین پیش کیتا اتے آکھیا جو اے ادارہ پاکستان دے نظریاتی تشخص کوں ظاہر کرݨ اتے نویں نسل اچ وطن نال محبت، تحریکِ پاکستان دے مقصد اتے قومی یکجہتی دے جذبے کوں ودھاوݨ اچ اہم کردار ادا کریندا پئے۔” انہاں مزید آکھیا جو ایجھی تقریباں نویں نسل کوں آپݨی تاریخ، ثقافت اتے قومی قدراں نال جوڑݨ دا ہک موثر ذریعہ ہن۔ انہاں ادارے دیاں کوششاں دی تعریف کریندیں آکھیا جو اے تقریب نہ صرف یومِ آزادی دے جذبے کوں زندہ رکھݨ دا سبب بݨی بلکہ طالب علماں کوں آپݨے ڳالھ تے قومی فخر کوں اُچا کرݨ دا موقع وی ݙتے۔ عطا اللہ تارڑ آپݨے خطاب دے چھیکڑ تے دعا کیتی جو “اللہ تعالیٰ پاکستان کوں ہمیشہ سلامت رکھے اتے ایں کوں ترقی دیاں نویں بلندیاں تئیں گھن ونڄے۔ تقریب چھیکڑ اچ تقریری مقابلیں اچ نمایاں پوزیشن گھنݨ آلے طالب علماں اچ انعام ونݙیے ڳئے۔ شرکاء کامیاب طالب علماں دی حوصلہ افزائی کریندیں آکھیا جو “او پاکستان دا مستقبل ہن اتے انہاں کوں آپݨی صلاحیتاں کوں استعمال اچ گھن آتے ملکی ترقی و خوشحالی اچ آپݨا کردار ادا کرݨا چاہیدے۔ تقریب اچ شریک سارے لوکاں پاک فوج دی ایں وݙی کامیابی تے ماݨ دا اظہار کیتا اتے وطن دی ترقی و استحکام کیتے آپݨی حمایت اتے عزم دا دوہرائے