حکومت آپݨی آئینی مدت پوری کریسی، معرکہ حق اچ پاکستان کوں عالمی سطح تے بے پناہ عزت ملی اے، اسحاق ڈار

لاہور۔13اگست (اے پی پی) ڈپٹی وزیراعظم / وزیر خارجہ محمد اسحاق ڈار آکھیے جو حکومت آپݨی آئینی مدت پوری کریسی، معرکہ حق اچ پاکستان کوں بے پناہ عزت ملی اے، وزیراعظم دی ٹیم معاشی اتے سفارتی محاذ تے کامیابیاں حاصل کریندی پئی اے۔ انہاں اے ڳالھ داتا گنج بخش علی ہجویریؒ دے عرس دی تقریبات دے شروع کرݨ دے بعد میڈیا نال ڳالھ مہاڑ کریندیں آکھی ۔ ایں موقع تے وفاقی وزیر مواصلات عبدالعلیم خان، صوبائی وزیر ہاؤسنگ بلال یسین سودھے ݙوجھے وی موجود ہن۔ ڈپٹی وزیراعظم محمد اسحاق ڈار آکھیا جو میں صدر مملکت آصف علی زرداری، وزیراعظم محمد شہباز شریف، مسلم لیگ (ن) دے قائد محمد نواز شریف، وزیراعلیٰ مریم نواز اتے ݙوجھیں ولوں دلوں 982ویں عرس دی مبارخ ݙینداں ۔ محمد اسحاق ڈار آکھیا جو “زائرین آپݨے دعویں دے نال نال پاکستان دی ترقی و خوشحالی کیتے وی دعا کرن، پاکستان ݙوجھی واری ترقی دے پاسے ٹردا پئے ، معیشت اتے سفارتی تعلقات اچ بہتری آندی پئی اے، اے سلسلہ اُو ویلھے تئیں جاری رہسی جݙاں تئیں پاکستان اسلام دا مضبوط قلعہ نئیں بݨ ویندا، اے لمبا سفر اے لیکن اے شروع تھی ڳئے۔” انہاں آکھیا جو “جشن آزادی اتے عرس مبارک رَل تے آئن، جشن آزادی وی تساں ساریں کوں ٻہوں مبارخ ہووے۔ نائب وزیراعظم آکھیا جو “اللہ دے فضل و کرم نال پاکستان کوں بے شمار کامیابیاں حاصل تھئن، جنہاں اچ اصل کامیابی معرکہ حق اے، جیں اچ افواج پاکستان ازلی دشمن بھارت کوں بدترین شکست نال ݙوچار کیتا، جیں نال پاکستان کوں عالمی سطح تے بے پناہ عزت ملی اے۔ محمد اسحاق ڈار آکھیا جو معاشی ترقی آلے پاسے وزیراعظم محمد شہباز شریف دی بھرپور توجہ اے، انہاں دی ٹیم معاشی اتے سفارتی محاذ تے کامیابیاں حاصل کریندی پئی اے، ڈس انفارمیشن توں پرہیز کرݨا چاہیدے، جݙاں تئیں کوئی ڳالھ ثابت نہ تھیوے اڳوں نئیں کھنڈاوݨی چاہیدی۔ انہاں آکھیا جو حکومت آپݨی آئینی مدت پوری کریسی، افواہواں تے یقین نہ کرو، سیاسی استحکام کیتے کوششاں کریندے پیوں ۔ انہاں آکھیا جو “جݙاں کوئی ملک اتے اداریں دے خلاف ہتھیار چا ڳھنے تاں او بغاوت ہوندی اے، عدالتی فیصلیں دا احترام کرݨا پوسی۔اسحاق ڈار آکھیا جو ساݙی حکومت پی ٹی آئی تے مقدمے بݨائے ہن نہ سہولت کاری کیتی ہئی۔ انہاں آکھیا جو جݙاں تئیں سارے ادارے اتے سیاسی جماعتاں رَل تے کم نہ کریسن ملک اڳوں نئیں ودھ سڳدا۔ انہاں آکھیا جو جتھاں تئیں دہشت گردی دا معاملہ اے، وزارت خارجہ اچ ݙو درجن لوکاں مذاکرات کیتن، اساں مجید بریگیڈ دے حوالے نال ثبوت ݙتے جو اے بی ایل اے دا حصہ اے، اساں اتنے ثبوت ݙتے جو امریکہ مجبور تھی تے ایں کوں دہشت گردی دی لسٹ اچ شامل کیتے۔ محمد اسحاق ڈار ہک سوال دے جواب اچ آکھیا جو پاکستان دی حکومت فلسطین دے حوالے نال بھرپور حمایت کیتی اے، اسلامی تنظیم دا اجلاس ٻہوں وختی جدہ اچ تھیسی۔” ہک ٻئے سوال دے جواب اچ انہاں آکھیا جو پاکستان ہر فورم تے واضح کیتے جو جے ساݙا پاݨی روکیا ڳیا تاں ایں کوں جنگ سمجھیا ویسی، انٹرنیشنل قوانین دے تحت ݙوہیں فریقاں دی مرضی نال کوئی معاہدہ ختم تھی سڳدے، اساں ہک پاݨی دے قطرے دی کمی برداشت نی کرسڳدے