محدود وسائل دے باوجود ہر طبقے دے مسافراں کوں بین الاقوامی معیار دیاں خدمتاں پیش کرݨ کیتے پرعزم ہیسے، حنیف عباسی

اسلام آباد۔13اگست (اے پی پی) وفاقی وزیر ریلوے محمد حنیف عباسی آکھیے جو “محدود وسائل دے باوجود ہر طبقے دے مسافراں کوں بین الاقوامی معیار دیاں خدمتاں پیش کرݨ کیتے پرعزم ہیسے۔ قومی اسمبلی دے سوالاں دے وقفے اچ قانون ساز دے سوالاں دے جواب ݙیندیں انہاں ݙسایا جو وݙے سٹیشز راولپنڈی سٹی، کینٹ، رائیونڈ، خانیوال اتے ملتان تے مسافراں دیاں سہولتاں کوں کافی حد تئیں اپ گریڈ کیتا ڳئے جیڑھا جو ہݨ صفائی، بیت الخلا دیاں سہولتاں اتے ویٹنگ ایریاز دے جدید معیار موجب ہن۔ انہاں مزید آکھیے جو لاہوروانڳوں کراچی اچ وی ریلوے سٹیشن کوں اپ گریڈ کریندے پیوں جیں دا کم 10 ستمبر کوں شروع کیتا ویسی۔ایں دے بعد حیدرآباد، سکھر اتے فیصل آباد دے سٹیشز دا 30 ستمبر کوں شروع کیتا ویسی، 31 دسمبر 2025 تئیں سارے وݙے سٹیشناں اتے جون 2026 تئیں سارے چھوٹے سٹیشناں کوں اپ گریڈ کر ݙتا ویسی۔ انہاں آکھیا جو اساں ہر طبقے دے مسافراں کوں بین الاقوامی معیار دیاں خدمتاں پیش کرݨ کیتے پرعزم ہیسے۔ مال بردار خدمتاں دے بارے اچ سوالاں دا جواب ݙیندیں وزیر ریلوے آکھیا جو رولنگ سٹاک اتے ویگناں دی کمی دے باوجود پاکستان ریلویز سندھ توں شروع تھیوݨ آلے ہک موثر ملک گیر کارگو نیٹ ورک کوں چلاوݨ اچ کامیاب تھیا جیں نال گزریل سال اچ نمایاں آمدݨ تھئی، مال برداری دنیا بھر اچ ریل دے نظام دی ریڑھ دی ہݙی دی حیثیت رکھیندی اے، ہݨ اساں ایں حصے اچ وی تبدیلی تے ودھدے پیوں ۔حنیف عباسی مزید آکھیا جو نارووال سیکشن 12 سال دے وقفے دے بعد ݙوجھی واری کم شروع کر ݙتے اتے موسیٰ پاک ایکسپریس کوں ملتان توں بحال کر ݙتا ڳئے، پنجاب، سندھ اتے بلوچستان دیاں حکومتاں دے نال مزید رستے دی بہتری اتے بحالی کیتے تعاون جاری اے۔ انہاں آکھیا جو اساں منقطع رستے کوں بحال کرݨ کیتے سندھ اتے پنجاب حکومت دے نال معاہدیں تے کم کریندے پیوں اتے اڄوکے مہینے وزیراعلیٰ سندھ دے نال ڳالھ مہاڑ جاری اے، بلوچستان دے نال ایں طرحاں دے تعاون شیخ زید توں کچلاک تئیں 50 کلومیٹر دی بلندی کوں ممکن بݨائے۔ انہاں آکھیا جو میں جݙاں توں عہدہ سنبھالئے خدمت دے تری اہم شعبیں ویلھے دی پابندی، صفائی اتے کھاوݨ دے معیار تے توجہ ݙتی، انہاں کوششاں نال قابلِ تعریف بہتری آئی اے، ویلھے دی پابندی ہݨ لاہور-راولپنڈی جیھے مخصوص رستیں تے 90 توں 95 فیصد تئیں پڄ ڳئی اے۔ ماس ٹرانزٹ متعلق ہک سوال دے جواب اچ وزیرریلوے واضح کیتا جو پاکستان ریلویز کراچی سرکلر ریلوے (کے سی آر) یا لاہور میٹرو جیھے منصوبیں اچ سِدھا شامل کائنی کیوں جو ایجھے اقدامات ہݨ 18ویں ترمیم دے بعد صوبائی دائرہ اختیار اچ آندن تاں جو جݙاں درخواست کیتی ونڄے تاں وزارت تکنیکی مدد ݙیوݨ کیتے دستیاب اے۔ حنیف عباسی آکھیا جو افغانستان اتے قازقستان دے ذریعے روس اتے یورپ تئیں ریل دی سفری سہولتاں ݙیوݨ کیتے وزیراعظم شہباز شریف ٻہوں محنت کیتی اتے پی ڈی ایم دور حکومت اچ انہاں قازقستان دا دورہ کیتا اتے ڈیوٹی نائب وزیراعظم و وزیر خارجہ سینیٹر اسحاق ڈار دے ذمے لاتی، میں اتے اسحاق ڈار افغانستان دے دورے تے ڳئے جتھاں اساں قازقستان اتے افغانستان دے وزیر خارجہ نال باضابطہ معاہدہ کیتا۔ انہاں ݙسایا جو اے ٹرین کوہاٹ توں مزار شریف براستہ خرلاچی تئیں اتے قازقستان بارڈر تئیں ویسی۔ انہاں آکھیا جو ازبکستان دے اندر 75 کلومیٹر دا ٹریک موجود اے، اے منصوبہ 10 ملین ڈالر دا اے، موجودہ بجٹ اچ اساں 5 ملین ڈالر مختص کیتن۔ انہاں آکھیا جو پاکستان ریلوے دی 77 سالہ تاریخ دے جدید ترین سٹیشن دا افتتاح 10 ستمبر کوں کراچی اچ تھیسی