یوم آزادی خوشیاں دا ݙینھ ، معرکہ حق اچ قوم ثابت کیتا جو دشمن پاکستان تے میلی اکھ نئیں پا سڳدا، پروفیسر احسن اقبال

اسلام آباد۔14اگست (اے پی پی) وفاقی وزیر برائے منصوبہ بندی پروفیسر احسن اقبال قوم کوں 78ویں یوم آزادی دی مبارخ ݙیندیں ہوئیں آکھیا جو اے خوشیاں اتے فخر دا ݙینہ اے، اڄ اساں معرکہ حق اچ کامیابی تے وی جشن منیندے پئیوں۔ اتھاں جاری بیان دے مطابق پروفیسر احسن اقبال آکھیا جو اڄ اساں معرکہ حق اچ کامیابی تے شکرگزار اتے جشن منیندے پئیوں، قوم ثابت کیتا جو کوئی دشمن پاکستان تے میلی اکھ نئیں پا سڳدا۔ انہاں آکھیا جو مسلح افواج کہیں وی جارحیت دا منہ ٻھن جواب ݙیوݨ دی صلاحیت رکھیندن، وزیراعظم دی سربراہی اچ سیاسی قیادت ثابت کیتا جو پاکستان دی عزت اتے شان کیتے کہیں فیصلے توں نئیں جھکچیندے۔ احسن اقبال آکھیا جو دنیا پاکستان دی تعریف کریندی پئی اے، آپریشن بنیان مرصوص اچ دفاعی شعبے اچ بے مثال کامیابی حاصل کیتی۔ انہاں آکھیا جو ہݨ معرکہ حق معاشی اتے اقتصادی میدان اچ لڑݨا اے، اڑان پاکستان نال ملک کوں ناقابل تسخیر اقتصادی قوت بݨایا ویسی۔ وزیر منصوبہ بندی آکھیا جو استاد، ڈاکٹر، انجینئر، تاجر، کسان اتے مزدور کوں 2035 تئیں پاکستان کوں ہک ٹریلین ڈالر دی معیشت بݨاوݨ دے ہدف کیتے آپݨا کردار ادا کرݨا پوسی۔ انہاں آکھیا جو ملک دا سب توں قیمتی سرمایہ ایں دے نوجوان ہن، اڑان پاکستان نینگراں کوں جدید مہارتاں نال لیس کریسی، او پاکستان دی سڃاݨ بݨ تے دنیا اچ آپݨی صلاحیت منویسن۔ انہاں دا آکھݨا ہا جو قائداعظم اتے علامہ اقبال دی سوچ کوں خراج تحسین پیش کریندن، شہیدائے آزادی دی قربانیاں پاروں اساں آزاد وطن دے رہݨ آلے ہیسے۔