14 اگست قربانیاں، جدوجہد اتے آزادی دے خواباں دی تعبیر دا ݙینھ اے، پاکستان اللہ تعالیٰ دی وݙی نعمت اے جئیں دی قدر ہر شہری تے فرض اے، وفاقی وزیر داخلہ محسن نقوی

اسلام آباد۔14اگست (اے پی پی) وفاقی وزیر داخلہ محسن نقوی پاکستان دے 78ویں یوم آزادی تے سنیھے اچ پوری قوم کوں دلوں مبارخ پیش کریندیں ہوئیں آکھیا جو اے ݙینہ قربانیاں، جدوجہد اتے آزادی دے خواباں دی تعبیر دا ݙینہ اے، پاکستان اللہ تعالیٰ دی بہوں وݙی نعمت اے جئیں دی قدر ہر پاکستانی تے فرض اے۔ وزارت داخلہ توں جاری بیان اچ محسن نقوی آکھیا جو قائداعظم محمد علی جناح فرمایا ہا جو پاکستان دا قیام مقدر ہا، اے کہیں دی بخشش نئیں بلکہ اساݙی جدوجہد دا صلہ اے، خون، اَڄھ، اتے شہادتیں اُو قیمت ہئی جو آزادی کیتے ادا کیتی ڳئی، اڄ دا پاکستان انہاں قربانیاں دی بنیاد تے قائم اے۔ انہاں آزادی دی شمع روشن کرݨ کیتے لکھاں مسلماناں دی بے بہا قربانیاں کوں سلام پیش کریندیں ہوئیں آکھیا جو وطن دے امن و دفاع کیتے جاناں قربان کرݨ آلے شہید اساݙے متھے دا جھومر ہن، انہاں دی عظیم قربانیاں کوں قوم ہمیشہ یاد رکھیسی۔ محسن نقوی شہیدائے وطن دے خانداناں دے عزم اتے حوصلے کوں خراج تحسین پیش کیتا اتے آکھیا جو شہیدائے وطن دے خاندان اساݙے آپݨے خاندان ہن۔ وزیر داخلہ آکھیا جو معرکہ حق اچ دشمن کوں عبرت آلی شکست ݙے تے پاکستان ثابت کیتا جو ایمان، اتحاد، تنظیم اڄ وی اساݙی طاقت، سنڄاݨ اتے بقا دی سب توں وݙی ضمانت اے، پاکستان دشمن کوں واضح اتے بھرپور جواب ݙتا جو اے 2025 دا پاکستان اے جو دفاع دی پوری صلاحیت رکھیندے۔ محسن نقوی آکھیا جو معرکہ حق دی جت دے بعد یوم آزادی دی خوشیاں کوں چار چندر لڳ ڳئن، پاکستان دا دفاع ناقابل تسخیر اے اتے کوئی دشمن پاکستان ݙے میلی اکھ نال نئیں ݙیکھ سڳدا۔ انہاں آکھیا جو ایمان، اتحاد اتے تنظیم جیڑھے سنہرے اصول پاکستان دی ترقی تے خوشحالی دے ضامن ہن اتے انشاءاللہ قوم ہر چیلنج توں سرخرو تھی تے نکلسی، یوم آزادی تے پاکستان دے روشن مستقبل کیتے نویں عزم اتے نویں سوچ دے نال اڳوں ودھݨ دا عزم کریندوں۔