14 اگست ایں عظیم جدوجہد اتے بے مثال قربانیاں دا عکس اے جو برصغیر دے مسلماناں پاکستان دے قیام کیتے ݙتی، چیئرمین سینیٹ سید یوسف رضا گیلانی

اسلام آباد۔14اگست (اے پی پی) چیئرمین سینیٹ سید یوسف رضا گیلانی یومِ آزادی دے موقع تے آپݨے خصوصی سنیھے اچ پوری قوم کوں مبارخ ݙیندیں ہوئیں آکھیا اے جو 14 اگست دا ݙینہ نہ صرف آزادی دی قیمتی نعمت دی یاد ݙویندے بلکہ ایں عظیم جدوجہد اتے بے مثال قربانیاں دا وی عکس اے جو برصغیر دے مسلماناں پاکستان دے قیام کیتے ݙتی۔ سینیٹ سیکرٹریٹ توں جاری بیان اچ انہاں آکھیا جو اساݙے بزرگاں اتے قائدین گھر بار، جائیداداں اتے جاناں قربان کر تے ہک آزاد اتے خودمختار مملکت دا قیام ممکن بݨایا جتھاں اساں آپݨے دین، ثقافت اتے روایتاں دے مطابق زندگی گزار سڳوں، اے قربانیاں آوݨ آلی نسلاں کیتے ہمیشہ رہنما رہسن اتے ایں گالھ دا ثبوت ہن جو ہک پرعزم اتے متحد قوم ہر منزل حاصل کر سڳدی اے۔ چیئرمین سینیٹ آکھیا جو “پاکستان دا قیام علامہ محمد اقبال دے خواب دی تعبیر اتے قائداعظم محمد علی جناح دی جرات مندانہ قیادت دا نتیجہ ہا۔ چیئرمین سینیٹ قوم تے زور ݙتا جو ایں یومِ آزادی تے اساں سارے اے عہد کروں جو رَل تے ہک پرامن، خوشحال، جمہوری اتے مضبوط پاکستان دے قیام کیتے کم کروں، ایجھا پاکستان جو شہیداں دے خواباں، وطن دے بݨاوݨ آلے لوکاں دے نظریات اتے عظیم رہنماواں دیاں امیداں دا حقیقی عکس ہووے۔